Ala măt kwang bàng đơng lam bồ càr Dăk Lăk, Ƀí thư Tỉñ ủy càr ồng Nguyễn Đình Trung pơyua jơnau gờm chờ niam bơnĕ tus mờ jơh ală kwang bàng, kông cưk, viên cưk, cau lơh broă bơh Anih Jơnau đơs Việt Nam Anih lơh broă sùm tàm tiah Tây Nguyên dê, gờm chờ ală cồng nha lơh jăt kơnòl broă yal tơngĭt jơnau, mblàng yal jơnau mờ Anih jơnau đơs Việt Nam đơs bal mờ Anih lơh broă sùm tàm tiah Tây Nguyên đơs is lơh geh tàm tơngai lài. Ƀí thư Tỉñ ủy càr Dăk Lăk đơs là, bal mờ broă lơh gơlik mờ pờ tơlik ală jơnau yal tơngĭt, jơnau cih ală jơnau gơlik geh pah ngai, Anih lơh broă sùm tàm tiah Tây Nguyên lơh broă lơh gơlik mờ pờ tơlik jơnau đơs 6 dà kòn cau tàm kờp jơh 13 dà kòn cau dùl êt nă cau bơh Anih Jơnau đơs Việt Nam mùl màl dipal ngan mờ bơta geh ngan. Do là dùl gah yal tơngĭt jơnau mblàng yal, gùng dà broă lơh broă dong kờl bơh Đảng, Dà lơgar dê tus mờ làng bol jơi bơtiàn kòn cau dùl êt nă cau dùl bă dipal mờ geh cồng nha pơgồp bơnah kwơmàng tàm bơta bơtàu tơnguh bal bơh càr dê.