Bơh jat sền, Thanh tra Sở Thông tin- Truyền thông càr Bình Dương mờ Kwang àng càr Bình Dương sền gŏ ồng P neh ngui mat is là “Pii Nguyen” pơnđàng tàm Facebook jơnau lơh bơchồt lơh roh bơta lơngap lơngai, rơndap tap sèng, đơs ờ niam mpồl lơh broă Kwang àng geh gơrềng tus dơ̆ broă gơlik geh tàm kơnhoàl Cư Kuiñ, càr Dăk Lăk dê. Lơh broă mờ anih lơh broă geh gơnoar, ồng N.T.P neh dờp broă lơh tìs bơh he dê là tìs mờ adat boh lam mờ hơ rơ̆p ờ gŏ lơh tìs tai. 

Thanh tra Sở Thông tin mờ Truyền thông càr Bình Dương neh lơh nền lơh glài mờ priă gơwèt mờ ồng P mờ khà priă 7 tơlak 500 rơbô đông bè broă tìs “Yal, tam pà jơnau yal lơh ờ niam bơngă pin dờn bơh anih lơh broă, mpồl lơh broă, să tờm, nùs nhơm bơh cau dùl nă să dê”. Anih lơh broă geh gơnoar kung sồr ồng P lời tĕ jơnau yal pơnđàng tìs mờ bơta geh ngan tìs mờ adat boh lam do dê.