Rơlao 1 nam do, tiah dà mbòr bơh ƀòn O Gia, xã Ia Pếch, kơnhoàl Ia Grai pal sơbì gời, ñhơ̆t hòn tìm lơh mbòr dà. Tài pah ngai, pah mang, dà mbòr gơtìp ƀô ồm bơh phơng sur bơh ală rơndăp broă ròng phan hờ đah tô dà hòr tus. Ồng Siu Xuân, cau kis tàm ƀòn ờ sŭk ơm mờ đơs: “Ngui dà mbòr nàng hùc mờ pìh phan. Bơh ngai wàng sur yuh dà tus tàm do, làng bol ƀòn lơgar ờ gơtùi ngui tai den tàng pal sơbì gời, tŭ do ƀô ƀơ̆ ngan, phơng sur klài bal mờ dà lơh dà jù tơn. Lài do den mìng yuh trồ ngai, tŭ do yuh trồ mang. Làng bol ƀòn lơgar lơh sră nàng dan ơm lơh broă wàng ròng sur do, mơya ờ geh gơnoar atbồ hơ sơl”.

Tàm tŭ hơ̆, tàm kơnhoàl Chư Prông, tŭ do kờp jơh geh 61 rơndăp broă ròng phan da geh gùng dà broă lơh nàng bơcri priă mờ neh mŭt lơh broă, geh 29% khà rơndăp broă ròng phan tàm càr Gia Lai dê. Mìng is xã Ia Piơr geh 19 rơndăp broă, xã Ia Lâu kung geh 16 rơndăp broă. Do kung là tiah làng bol ờ sŭk ngan tàm tơngai jŏ tài gơtìp ƀô ƀơ̆ ngai kung bè mang bơh ală wàng ròng phan tơlik.

Ồng Rah Lan Song Linh, Phó kwang atbồ Gah niam chài mpồl bơtiàn HĐÑZ càr Gia Lai neh tus sền tàm ală rơndăp broă lơh wàng ròng phan gơtìp ƀơ̆, geh jơnau lùp tàm pơrjum HĐÑZ càr Gia Lai. Ồng đơs là, bơta kal ke do di gơlan geh bơsong bơh tŭ tus sền rơndăp broă lơh: “Tàm kơnhoàl Chư Prông, tŭ do rơndăp broă ròng sur, tàm hơ̆ uă ngan là tàm xã Ia Piơr neh tơlik kơrnoăt lơh glài mờ ờ ai lơh broă tai. Mơya mpồl lơh sa kă bro do kung gam yuh dà, lơh làng bol gơtìp ờ sŭk ngan. Bơh sơnrờp ngan, lòt sền, jòi tiah nàng mpồl lơh sa kă bro in lơh jăt rơndăp broă mờ ờ gŏ broă lơh bơh tô dà bè hơ̆, rềp hìu làng bol bè hơ̆ nàng yal mờ kấp geh gơnoar in sền, geh gùng dà broă lơh ndai”.

Mùl màl, nàng dùl rơndăp broă ròng phan geh lơh broă pal sơrlèt mờ uă broă lơh bơh broă dan geh dờp gùng dà bơcri priă, sền bơta gơrềng tus tiah kis mờ ai sră tơl bơta niam nàng ròng phan. Tàm hơ̆ uă ngan gơwèt mờ tiah kis, ală rơndăp broă lơh ndrờm pal geh sền tus mờ bơta gơrềng tus tiah kis, ai sră bè tiah kis khăt di tàm broă lơh dờng ha là dềt. Tàm mùl màl, geh uă mpồl lơh sa kă bro “dô” ờ lơh sră bè broă ai sră tiah kis, dờp bơta tìs tài gơtìp lơh glài ờ hềt tơl pràn nàng kơrian. Ồng Lưu Trung Nghĩa, Kwang atbồ Sở Nông nghiệp mờ Phát triển Nông thôn càr Gia Lai mblàng: “Tŭ do broă lơh glài, kấp kơnhoàl lơh glài rơndăp broă lơh di mơ mờ dềt den mìng geh lơh glài bơh 10 tus 15 tơlăk đong; mpồl lơh broă dờng, lơh glài bơh 15 tus 20 tơlăk đong. Ờ uă ngan pơn drờm mờ khà priă bơcri git nđờ jơ̆t tơmàn đong bơh mpồl lơh sa kă bro dê. Broă tai là tŭ do ờ hềt geh kơrnoăt bè broă tus sền nàng git kông nghệ gơwèt mờ ală rơndăp broă ròng phan”.

Jăt jơnau kờp bơh gah phan geh is mờ tiah kis càr Gia Lai dê, tŭ do tàm càr kờp jơh geh 209 rơndăp broă ròng phan geh ai gùng dà broă lơh mờ gam dan ai gùng dà broă lơh. Mơya mìng geh dùl bơnah dềt lơh jăt nền nòn broă ai sră bè tiah kis. Bơh bồ nam tus tŭ do, bơh broă tus sền bơh gah lơh broă geh gơnoar dê, UɃÑZ càr Gai Lai neh lơh glài 7 mpồl lơh sa kă bro tài ờ geh sră ai tiah kis, mơya kung gam lơh broă. Bŭ lah bè hơ̆, jăt ồng Phạm Minh Trung, Kwang atbồ Sở Tài nguyên Môi trường càr Gia Lai đơs, broă lơh tàm tơngai tus, nàng gàr niam tiah kis tàm ală rơndăp broă ròng phan, den pal geh broă pơgồp bal bơsong đah ală gah lơh broă tàm càr dê: “Pa do bol añ mìng rơ̆p bơsong gah phan geh is mờ tiah kis. Mơya dùl rơndăp broă mŭt lơh broă den gơrềng tus mờ gùng dà bơcri priă bơh Sở Kế hoàc mờ Đầu tư dê, gơrềng tus mờ broă ròng phan, lơh sơnơm phan ròng bơh Sở Nông nghiệp mờ Phát triển Nông thôn dê, gơrềng tus tàm tiah hơ̆, ai tơngŏ bơta tìs gơrềng tus kwang àng. Bơta do pal geh broă tus bal bơh ală sở, gah lơh broă gơrềng bal nàng tus sền nàng bơsong jơh, bañ lời mpồl lơh sa kă bro gơtìp tus sền, lơh glài hơ̆ sồng pơn jăt tai lơh broă”.

Nàng tơmù ală bơta kal ke do, UɃÑZ càr Gia Lai neh geh sră nggal đơng lam Sở Kế hoạc mờ Đầu tư pơgồp bal mờ ală Sở, gah lơh broă, ală kơnhoàl, thị xã gơrềng bal pơn jăt tai bơto sồr ală gùng dà bơcri priă lơh gơs sră nggal di jăt mờ kơrnoăt neh geh ai; lơh jăt ală kơrnoăt bè sền gàr tiah kis; tă wơl dia gơwèt mờ ờ uă rơndăp broă lơh. Sở Kế hoạc mờ Đầu tư càr Gia Lai pà git, gơwèt mờ gah ròng phan, Sở dan mờ UɃÑZ càr nền nòn tàm broă hòi jà rơndăp broă, mìng geh hòi jà ală rơndăp broă lơh dờng, ròng phan ndơ̆p, ngui kông nghệ gơguh jăk nàng gàr niam tiah kis mờ ală rơndăp broă lơh pơgồp bal mờ broă lơh gơs ală phan bơh broă ròng phan nàng gàr geh bơta kwơ; ờ hòi jà ală rơndăp broă lơh dềt, ờ uă, kông nghệ lơh broă ờ pràn, ờ niam.