Tơnơ̆ tŭ iat kwang đơng lam bồ càr Dăk Lăk yal tơnggit jơnau ngan ngồn bè broă gơlik geh lơh roh bơta lơngăp lơngai tàm àng drim gờñ ngai 11/6 pa do, Ƀộ trưởng ồng Tô Lâm đơs nền, broă gơlik geh tàm kơnhoàl Cư Kuiñ, càr Dăk Lăk tàm àng drim gờñ ngai 11/6 là broă lơh sò tơm iơh bơsak, lơh roh bơta lơngăp lơngai kơn jơ̆ ngan, geh mpồl cau, geh bơta rơcang lài, tràl sơbil ngan. Ƀộ Kwang àng neh sồr ală mpồl sơrbac mhar tus bal wàng kup bol do, mờ kung sồr mpồl tus sền gàr lơngăp lơngai ai làng bol in.

Ƀộ trưởng ồng Tô Lâm đơs sùm, tus tŭ do, jơh ală bol tus bal tàm broă lơh roh bơta lơngăp lơngai neh gơtìp kup, bơta lơngăp lơngai tàm càr Dăk Lăk neh gơ rê bè ờs wơl, rài kis làng bol dê kung gơ rê wơl bè ờs. Ƀộ trưởng sồr càr Dăk Lăk tàm tơngai tus bañ sền ờ sơp, lơh niam broă sền gàr lơngăp lơngai dà lơgar bơh ù tiah ƀòn lơgar, bơdìh hơ̆ tai, pal tơnguh uă kơnòl broă bơh cau atbồ dê. Tàm broă sền gàr lơngăp lơngai dà lơgar ală tiah kuơmàng, ngan là tiah Tây Nguyên pal sơlơ tơnguh rlau tai, pơgồp bal jơh nùs đah rơcang sơndră mpồl bơtiàn mờ rơcang sơndră mờng chài lơh broă.

Tàm dơ̆ lơh broă, Ƀộ trưởng ồng Tô Lâm neh jàu Ƀằng khen bơh Ƀộ Kwang àng dê ai 5 nă cau dùl nă să là ală làng bol neh geh cồng nha jak ngan tàm srơh jơh gùt làng bol sền gàr lơngăp lơngai dà lơgar, pơgồp bơnah sền gàr lơngăp lơngai tàm ƀòn lơgar.