Ƀộ trưởng Ƀộ Kwang àng ồng Tô Lâm đơs nền, lơgar Việt Nam sùm sền dờng màng mờ kơ̆p kờñ bal mờ lơgar Nga pơn jăt tai ai gĭt gơ̆p lơh bơyô bal ờs mờng bơh yau đah 2 lơgar ngai sơlơ bơtàu tơnguh, geh cồng nha, geh kwơ ngan ngồn, kơ̆ kơl jăp jŏ jòng mờ pin dờn. Jăt tàm bơta gĭt gơ̆p niam bơnĕ đah lơgar, gĭt gơ̆p lơh broă bal đah Ƀộ Kwang àng lơgar Việt Nam mờ Ƀộ Bơta jal mhar lơgar Nga dê neh geh lơh bơh uă nam do, lơh geh cồng nha niam bơnĕ tàm uă gah broă.

Ƀộ trưởng Ƀộ Bơta jal mhar lơgar Nga ồng Kurenkov Aleksandr Vyacheslavovich đơs nền, bơta lơh broă bal kơ̆ kơl jăp đah 2 ƀộ tàm uă gah broă lơh, kwơmàng là gah broă lơh rơcăng sơndră lài crùh ồs sa mờ dong kờl rềs àr, tam pà bal bơta mờng chài yal tơngkah lài mờ bơsong bơta jal mhar neh pơgồp bơnah lơh jrô ơnàng, lơh kơ̆ kơl jăp bơta gĭt gơ̆p lơh bơyô bal, ờs mờng bơh yau đah 2 dà lơgar ngai sơlơ kơ̆ kơl jăp mờ bơtàu tơnguh.