Đơs tàm dơ̆ tìp, Đại tướng Phan Văn Giang, Ƀộ trưởng Ƀộ Quôk phòng lơgar Việt Nam đơs nền, do là dùl broă geh gơtha kah yau, pơgồp bơnah cih tai ală pang sră jơnau kah yau pa bơh bơta gĭt gơ̆p lơh bơyô bal ờs mờng bơh yau, tam klăc bal mờ lơh broă bal tơl làm đah 03 lơgar.

Đại tướng Chansamone Chanyalath, Phó Thủ tướng Cíñ phủ, Ƀộ trưởng Ƀộ Quôk phòng lơgar Lào đơs nền: Mpồl ling 03 lơgar pal là mpồl cau tờm tàm broă bơ̆t bơtàu, sền gàr, prăp gàr mờ bơtàu tơnguh bơta gĭt gơ̆p lơh bơyô bal, tam klăc bal kwơmàng đah pe lơgar. Đại tướng Tea Seiha, Phó Thủ tướng, Ƀộ trưởng Ƀộ Quôk phòng lơgar Campuchia đơs sùm: Broă lơh Tìp măt Lơh bơyô bal Sền gàr dà lơgar dơ̆ sơnrờp 03 lơgar: Campuchia- Lào mờ Việt Nam là tŭ niam nàng ală gah in sền swì bal ală broă lơh, cồng nha neh lơh geh mờ đơs nền tai jơnau hơ pơrgon pràn kơldang kơ̆ kơl jăp tàm broă sơlơ tơnguh tai gĭt gơ̆p lơh bơyô bal ờs mờng bơh yau, lơgar rềp bal niam bơnĕ cèng wơl bơta kwơ bal ai dà lơgar mờ Làng bol in.