Jơnau yal bơh Kwang đơng lam bồ Tỉñ ủy mờ Ủy ƀan Ñân zân càr Kon Tum dê pà gŏ, càr Kon Tum kờp jơh geh bă ù lơh sa suơn sre rlau 902 rơbô lồ, pal sền gròi ngan là geh tus mờr 170 rơbô ù brê bơnơm ờ hềt geh brê. Càr sền gĭt tàm broă lơh sa suơn sre bơtàu tơnguh lơh sa phan lơh sơnơm là tờm ngan.

Tŭ do, gùt càr geh rlau 6 rơbô 800 lồ tờm lơh sơnơm, tàm hơ̆ bă ù tờm kơnuh sơnơm Ngọc Linh là rlau 1 rơbô 700 lồ. Tàm broă bơtàu tơnguh lơh sa suơn sre, brê bơnơm càr Kon Tum gam tìp uă bơta kòl yan, bè broă tam gơl jơnau kờñ ngui ù brê; ờ hềt geh jơnau cih ai apah brê ờs ngui mờ brê rcang gàr bồ tô dà nàng bơtàu tơnguh lơh sa tềng hơđơm mƀur brê; broă lơh dong kờl bơtàu tơnguh brê bơnơm ờ hềt di pal mờ jơnau sồr geh ngan....

Jat Ƀộ trưởng ồng Lê Minh Hoan, gơwèt mờ ală bơta kòl yal geh gơrềng tus kơrnoat boh lam, càr Kon Tum bal mờ Ƀộ Nông nghiệp mờ phát triền Nông thôn pal pơn jat tai lơh kràñ cê jơh nùs, lơh ngan lơh di mờ pleh mờ broă lơh lời tĕ nggùl tơngai lơh broă lơh roh tĕ tŭ tơngai niam bơtàu tơnguh. Ƀộ trưởng đơs là, Kon Tum bơh sơn rờp neh geh gùng lòt di ngan bè bơtàu tơnguh lơh sa suơn sre, brê bơnơm, mơya pal tơrgùm wơl bơta kwơ lơh sa mờ bơta kwơ lơh gơlik phan, drơng broă kă bro, drà kă bro in. Ƀộ trưởng kung đơs nền, Ƀộ Nông nghiệp mờ Phát triển Nông thôn geh pơn jat tai pơgồp bal, dong kờl càr Kon Tum tàm broă yal tơngĭt, hòi jà, gơ hòi gơ jà bơcri priă tàm gah lơh sa suơn sre bơh càr dê tàm tơngai tus.