Tơnơ̆ dơ̆ wă rò, Ƀộ trưởng ồng Tô Lâm bal mờ Ƀộ trưởng Ƀộ Kwang àng lơgar Nga lơh dơ̆ cribơyai. Ƀộ trưởng ồng Tô Lâm đơs nền, bơta gĭt gơ̆p lơh broă bal đah Ƀộ Kwang àng lơgar Việt Nam mờ Ƀộ Kwang àng lơgar Nga geh ală broă bơtàu tơnguh niam ngan tàm ală gah.

Tàm dơ̆ cribơyai, 2 gah neh ring bal rơ̆p lam lơh geh cồng nha “Broă lơh pơgồp bal lơh broă đah Ƀộ Kwang àng lơgar Việt Nam mờ Ƀộ Kwang àng  lơgar Nga tơngai bơh nam 2022- 2024” kĭ tàm nhai 05/2022; Pơn jat tai tàm pơgơl jơnau yal cau lơh tìs, lùp khàu, lơh glài ală broă geh gơrềng tus 2 gah dê. 2 gah kơlôi sơnơng bơta digơlan lơh kơrnoat boh lam pơgồp bal tàm broă lơh dong kờl sền gàr cau lơh sa kă bro, kơnòm bơsram mờ làng bol lơgar do dê lơh broă, bơsram sră mờ lơh broă sa, ơm kis tàm lơgar ne, gàr niam gơnoar, bơta kwơ di mờ adat boh lam bơh làng bol 2 lơgar dê, kung bè rcang lài rcang sơndră ală broă lơh cau lơh tìs, lơh tìs adat boh lam, lơh aniai ai lơngăp lơngai dà lơgar bơh lơgar Việt Nam mờ Nga dê.