Kung tàm dơ̆ lòt còp ngan ngồn lơgar Ấn Độ, Đại tướng ồng Phan Văn Giang, Ủy viên Ƀộ Cíñ trị, Phó Ƀí thư Quân Ủy Dà lơgar, Ƀộ trưởng Ƀộ Quôk phòng lam bồ mpồl Kwang bàng kấp dờng Ƀộ Quôk phòng lơgar Việt Nam neh tus còp să Kwang atbồ lơgar Ấn Độ mò Droupali Murmu tàm càr lơgar New Delhi.

Đơs tàm dơ̆ tìp mat, Ƀộ trưởng ồng Phan Văn Giang đơs nền Việt Nam sùm sền dờng màng broă bơt bơtàu mờ bơtàu tơnguh bơta gĭt gơ̆p lơh bơyô bal bơh yau, lơgar lơh broă bal kwơ màng tơl làm mờ lơgar Ấn Độ neh geh Củ tịc Hồ Chí Minh mờ Thủ tướng lơgar Ấn Độ ồng Jawaharlal Nehru lơh bơnàng jă mờ geh ală rơnàng đơng lam bồ, làng bol 2 lơgar lơh ngan bơt bơtàu mờ bơtàu tơnguh. Kwang atbồ lơgar Ấn Độ đơs nền dơ̆ lòt còp rơ̆p lơh đềt mềr rlau tai bơta gĭt gơ̆p lơh broă bal kwơ màng tơl làm đah 2 lơgar dê. Jờng rơ uă ngan cồng nha tìp mat đah 2 nă Ƀộ trưởng Quôk phòng 2 lơgar dê, Kwang atbồ lơgar Ấn Độ đơs sùm bơta gĭt gơ̆p sền gàr dà lơgar đah 2 gah pơn jat tai tàm bơta bơtàu tơnguh niam ngan, lơh broă bal ngan ngồn geh cồng nha, tă pơgồp kwơ màng tàm bơta gĭt gơ̆p lơh broă bal đah 2 lơgar dê.