Ngai dunia kơnòm dềt (01/6) mờ kung là ngai Vi cất ziñ zưỡng, tàm 2 ngai, 01 mờ 02/6, Ƀộ Y tế lam lơh Broă lơh ai hùc Vitamin A dơ̆ 1 nam 2023 ai kơnòm dềt tàm gùt lơgar in. Ƀộ trưởng Ƀộ Y tế mò Đào Hồng Lan neh lòt sền tơn broă lam lơh broă do tàm sơnah ƀòn Điện Biên, quận Ba Đình, ƀòn dờng Hà Nội. Yal mờ Mpồl kwang bàng bơh Ƀộ Y tế dê, Kwang atbồ Sở Y tế Hà Nội mờ Trần Thị Nhị Hà pà git, dơ̆ do, tàm càr lơgar geh rlau 630 rbô nă kơnòm dềt tàm sơnam geh hùc Vitamin A tàm 1 rbô 744 anih.

Ƀộ trưởng Ƀộ Y tế mò Đào Hồng Lan pà git, Vitamin A ai hùc kơnòm dềt in geh Mpồl Vitamin Angel- lơgar Mỹ dong kờl. Tơngai lài, tài mpồl lơh gơlik gơtìp kal ke den tàng khà Vitamin A dơ̆ do geh tam pà jơ la. Kờp dŭ geh mờr 6 tơlak nă kơnòm dềt tàm gùt lơgar geh ai hùc bơ tơl Vitamin A. Mìng is tàm 22 càr tiah kơh bơnơm kal ke, sơnam kơnòm dềt hùc Vitamin A geh rề ơnàng rlau, bơh 6 nhai tus 59 nhai. Bơdìh hơ̆ tai, kơnòm dềt bơh 24 tus 59 nhai geh ai hùc sơnơm jrơs jat tơngai pơrgon. Broă lơh do neh dong lơgar he gơtùi tơn jơh kòp jơngo mat tài ờ tơl Vitamin A tàm nam 2000.