Do là jơnau sồr bơh Phó Thủ tướng ồng Trần Hồng Hà dê tàm dơ̆ pơrjum mờ Ƀộ Y tế bal mờ bàr pe tiah bè rơndap broă lơh tơrgùm bal rơndap tap sèng wơl hìu sơnơm gơwèt Ƀộ Y tế, geh bơyai lơh tàm mho ngai 01/06.

Tŭ do, Ƀộ Y tế geh 34 hìu sơnơm dờp kơnòl broă kham sơm kòp kấp lồi dŭt, đơng lam kấp, bơto bơtê mpồl cau lơh sơnơm, ngan là tàm bơta jơnau gĭt wă tơnơ̆ bơsram đại họk; kơlôi sơnơng, bơtàu tơnguh, tàm jàu ală măy mok pa...

Jat rơndap broă lơh, broă rơndap tap sèng, rơndap wơl hìu sơnơm geh Ƀộ Y tế sồr pơn jat tai atbồ tơn 30 hìu sơnơm. Gam Hìu sơnơm 74 Dà lơgar (anih lơh broă tàm Vĩnh Phúc) tàm jàu wơl bè ờs ai Ủy ƀan Ñân zân càr Vĩnh phúc in atbồ; Hìu sơnơm 71 Dà lơgar (anih lơh broă tàm Thanh Hóa), Hìu sơnơm Điều dưỡng-lơh pràn wơl să jan Dà lơgar (tàm Thanh Hóa) bơyai lơh wơl Hìu sơnơm lơh broă lơh bơh Hìu bơsram Đại họk Y Hà Nội dê; Hìu sơnơm dờng Dà lơgar Quảng Nam bơyai lơh wơl gơ gơs anih 3 bơh Hìu sơnơm dờng Dà lơgar Huế dê.