Đơs tàm dơ̆ pơrjum tìp măt, ồng Hoàng Minh Nhân, Củ tịc Mpồl git gơ̆p lơh bơyô đah lơgar Việt Nam mờ lơgar Nga ƀòn dờng Hồ Chí Minh neh yal wơl bơta gơlik geh rài lài do “10 ngai lơh gơmprơm dunia” bơh dơ̆ kăc màng Nhai 10 lơgar Nga.

Tàm lơgar Việt Nam, kăc màng Nhai 10 lơgar Nga geh dùl bơta kwơ màng ngan, lời wơl geh bơta gơrềng bal dờng màng gơwèt mờ broă kăc màng bal mờ bơta bơtàu tơnguh pơn jăt tai dà lơgar dê. Mờ ai geh bơnàng jă ai bơta git gơ̆p ờs mờng niam bơnĕ đah bàr jơi bơtiàn Việt Nam mờ Nga. Ồng Valery Mikhailovich Karchagin, Lãñ sự-Tham tán Tổng lãñ sự quán lơgar Nga tàm ƀòn dờng Hồ Chí Minh pà git: Ngai chờ do geh ai gŏ ală bơta kwơ màng tờm ngan bơh jơi bơtiàn lơgar Nga dê, nùs nhơm kờñ gơboh mờ dà lơgar, broă tus bal, đềt mềr bal nàng sền gàr bơta khăt gơboh bal mờ lơngăp lơngai bơh să tờm dê. Jăt ồng Valery Mikhailovich Karchagin đơs, lơgar Nga đơs niam broă dong kờl bơh ală lơgar đềt mềr oh mi, tàm hơ̆ uă ngan là làng bol lơgar Việt Nam dê.