Mờ bơta krơi is mùl gŏ sùm là càr kal ke, gal làng bol jơi bơtiàn dùl êt nă cau ơm kis, bơh nam 1994, tŭ càr Kon Tum geh crơng gơs wơl jăt tàm bơta tam cah bơh càr Gia Lai- Kon Tum, tàm bềng lìu bơta kal ke, Tỉñ ủy càr Kon Tum geh Jơnau sồr sồ 10, pơn jăt tai là Kơrnoăt sồ 01 nam 1996, Kơrnoăt sồ 04 nam 2007 bal mờ gùng dà broă lơh sùm là ală anih lơh broă, anih lơh broă lơh oh mi bal bơ̆t bơtàu xã tiah jơi bơtiàn dùl êt nă cau, tiah lơh sa pa kal ke ir. Ồng Ka Ba Tơ, lài do là Phó Ƀí thư Duh broă sùm Tỉñ ủy càr, Củ tịc Hội đồng Ñân zân càr Kon Tum lài do, pà gĭt: Bơh Jơnau sồr sồ 10 tus Kơrnoăt sồ 01, Kơrnoăt sồ 04 geh bơta kwơ mờ geh gơtha kwơmàng ngan. Kơrnoăt lơh ai kwang bàng, đảng viên mờ làng bol in tơrgùm bơtàu tơnguh lơh sa- mpồl bơtiàn dùl bă pràn kơldang mờ kơ̆ kơl jăp. Dơ̆ bàr là bơ̆t bơtàu Đảng pràn kơldang kơ̆ kơl jăp lơh mpồl cau tờm kung bè gơnoar broă lam lài bơh kwang bàng, đảng viên dê nàng tề lam làng bol lơh jăt di ală Kơrnoăt bơh Đảng, Dà lơgar dê.

Lơh jăt ală Jơnau sồr, Kơrnoăt wèt tus ƀòn lơgar, wèt tus tiah jơi bơtiàn dùl êt nă cau kal ke ir bơh Tỉñ ủy càr Kon Tum dê, tàm ală nam do neh geh gĭt nđờ jơ̆t rbô nă kwang bàng, đảng viên ală kâp bơh càr dê ơm rềp mờ thôn, ƀòn “ơm bal, sa bal, lơh bal”; iăt kơno jơnau đơs, bơta kơ̆p kờñ, jơnau kơlôi sơnơng, bơsong jơnau dan, bơta kơ̆p kờñ bơh làng bol dê. Kâp ủy, Đảng viên wèt tus hờ ƀòn lơgar, wèt tus hờ tiah jơi bơtiàn dùl êt nă cau kal ke nàng sền gròi bơtàu tơnguh lơh sa- mpồl bơtiàn, bơtàu tơnguh uă rài kis ai làng bol in. Ồng Dương Văn Trang, Kwang bàng Đảng Dà lơgar, Ƀí thư Tỉñ ủy càr, Củ tịc Hội đồng Ñân zân càr Kon Tum đơs nền: Neh là kwang bàng đảng viên dong kờl hìu rƀah, hìu mờr ndrờm bè hìu rƀah làng bol jơi bơtiàn dùl êt nă cau săc rwah broă lơh, gùng dà lơh sa nàng brồ guh lik klàs bơh rƀah là lòt tus tơn tàm mìr tàm sre, tàm sươn mờ lơh jăt jơnau đơs “đơs sùm kung gĭt sơl”mờ “ià tê sơñio broă” lơh geh wơl bồ tơngoh kơ̆p kờñ ngan brồ guh is lik klàs rƀah bơh làng bol jơi bơtiàn dùl êt nă cau dê. Do là dùl tàm ală kơnòl broă cíñ trị kwơmàng bơh tơl nă kwang bàng, đảng viên tàm ƀòn lơgar mờ tiah làng bol ơm kis geh gal làng bol jơi bơtiàn dùl êt nă cau ơm kis.

Mờ jơnau đơs, đơs nàng làng bol in wờng, lơh nàng làng bol in dòn, rùp rài ală kwang bàng đảng viên jơh nùs jơh tồr tàm broă sền gròi dong kờl bơtàu tơnguh bơto bơtê, lơh sơnơm; bơto pơlam làng bol lơh gùng lòt ƀòn lơgar, tam tờm kau su, kơ phê, ai phan ròng lik bơh rồm hìu rơng, tam uă tờm chi lơh sơnơm...mờng kwèng mờ tơl nă làng bol, tơl ƀòn, tơl xã. Ồng Trương Hồng Doanh, Ƀí thư Đảng ủy xã Đăk Kôi, kơnhoàl Kon Rẫy, càr Kon Tum pà gĭt, Đảng ƀộ xã geh 156 nă Đảng viên, tàm hơ̆ đảng viên cau jơi bơtiàn dùl êt nă cau geh rlau 83%. Ală đảng viên tàm xã sùm lơh krơh lam lài mờ geh làng bol pin dờn kờñ gơboh ngan. Ồng Trương Hồng Doanh, đơs: Ală oh mi đảng viên tàm do sùm lơh jăt geh nùs nhơm lơh krơh lam lài, kwơmàng tàm broă sền gàr niam lơngăp lơngai rơndăp tăp sèng, lơngăp lơngai mpồl bơtiàn tàm ƀòn lơgar. Ală oh mi đảng viên bơh ală ci ƀộ dê mờ kwơmàng là đảng viên cau jơi bơtiàn dùl êt nă cau sùm mblàng yal, hòi jà làng bol bañ từp, bañ lơh jăt jơnau bol ờ niam dê bơchồt. Xã tŭ do ờ gam tai ală adat bơhiàn bơngơl gơla. 451 hìu làng bol jơi bơtiàn dùl êt nă cau rƀah, mờr ndrờm bè hìu rƀah ngui geh cồng nha ală priă jền bơh hìu bơnhă dê, priă càn nàng bơtàu tơnguh lơh sa. Tus tŭ do, ală hìu làng bol jơi bơtiàn dùl êt nă cau geh bơta bơtàu tơnguh pràn ngan.

Bơh bơta tơrgùm bal pràn, dùl nùs bal bơh Đảng mờ làng bol dê, càr Kon Tum neh tơrmù geh khà hìu bơnhă rƀah bơh rlau 65% tơngai crơng gơs wơl càr nam 1991 gơmù gam hơđơm 11% tàm lồi nam 2022 pa do. Lơh geh gờñ jơnau kờñ jơh ală xã geh gùng rơndeh ô tô lòt tus tiah tờm xã; cồng nha bơto bơtê geh tơnguh uă; Hìu sơnơm ală xã ndrờm geh ƀak sĩ...Bal mờ hơ̆ là bơ̆t bơtàu geh ală anih lơh broă cíñ trị pràn kơldang bal mờ 14 Đảng ƀộ gơ wèt bal, bal mờ rlau 31 rbô 300 nă đảng viên. Ồng Nguyễn Thanh Long, 76 sơnam, mŭt Đảng neh 56 nam do ơm tàm mpồl 4, tiah drà 3, thị trấn Đăk Tô, kơnhoàl Đăk Tô đơs là, dùl tàm ală cồng nha dờng ngan rlau jơh bơh Đảng ƀộ càr Kon Tum dê là neh bơto bơtê, bơ̆t bơtàu geh mpồl kwang bàng đảng viên cau jơi bơtiàn dùl êt nă cau ơm kis bơh jŏ dùl bă tiah. Ồng Nguyễn Thanh Long, đơs: Mpồl kwang bàng cau tàm ƀòn tŭ do bơh càr tus dì kơnhoàl, tus tàm xã bulah là ờ hềt lơh geh tơl jơnau sồr tam gơl bơta yau gơ gơs bơta pa ờ mơya sền bal dilah kờñ den cau gơtùi ñă ntàu đơng lam tơn dùl bă tiah cau bơ̆t bơtàu, cau lam bồ làng bol neh gơtùi rao ờ duh kờñ pal Dà lơgar bơtơl ờ. Niam ngan là bơta lơngăp lơngai cíñ trị, lơngăp lơngai jơh gùt mpồl bơtiàn.

Pơgăp mờ do rlau 2 nam, Mpồl lơh broă sùm Tỉñ ủy càr Kon Tum pơn jăt tai sồr lơh lam lơh Dơ̆ hòi jà “Lơh tam gơl bơta kơlôi sơnơng, broă lơh bơh làng bol jơi bơtiàn dùl êt nă cau dê, lơh ai làng bol jơi bơtiàn dùl êt nă cau in brồ guh lik klàs rƀah kơ̆ kơl jăp”. Tơnơ̆ rlau 2 nam, jơh gùt càr Kon Tum geh rlau 6 rbô 100 hìu klàs bơh rƀah, gĭt nđờ rbô hìu jơi bơtiàn dùl êt nă cau rơhời sang tĕ ală adat bơhiàn bơngơl gơla ờ gam kwơ tai, ờ gam tơmang ir, kơldìng wơl ir mờ neh brồ guh is pơđơl pràn is; gĭt ngui bơta jak chài măy mok tàm broă lơh sa; mờr 3 rbô 600 hìu jơi bơtiàn dùl êt nă cau mŭt bal tàm ală mpồl lơh broă bal, hợp tak xã...Gơ wèt mờ làng bol ală jơi bơtiàn tàm càr Kon Tum, Đảng sùm rềp mềl, tam klăc đềt mềr mờ làng bol. Đảng viên pa ồng A Niêng, gơ wèt Ci ƀộ thôn Tu Khối, xã Đăk Kôi, kơnhoàl Kon Rẫy, càr Kon Tum đơs: Geh mŭt tàm mpồl Đảng añ chờ hờp ngan. Să tờm añ rơ̆p lơh ngan jơh pràn he dê lùp bơsram, bơtơl tai bơta gĭt wă. Añ bơsram geh bơta lơi niam rơ̆p rê bơto yal wơl làng bol in, dong làng bol tàm thôn tam phan, ròng phan dong làng bol klàs bơh rƀah. Bơto pơlam dong ai ơruh pơnu in geh broă lơh.

Bơta pin dờn bơh cau Sơdàng, Bahnar, Jeh Triêng, Jrai, Brâu, Rơ Măm, Hrê dê tàm càr Kon Tum gơ wèt mờ Đảng, Wa Hồ neh geh lòng bơh 2 rài tam lơh mờ bol sò tơm Tây mờ bol sò tơm Mỹ sơgràm phà dà lơgar. Tàm gùng lòt lơh jăt jơnau kờñ làng bol pas sơm, dà lơgar pràn kơldang, làng bol lơh tờm, ring bal, bơtàu tơnguh, Đảng ƀộ càr Kon Tum sùm geh bơta lòt bal bal mờ bơta pin dờn ngan, dùl nùs dùl tồr sùm mờ Đảng bơh cau Sơdàng, Bahnar, Jeh Triêng, Jrai, Brâu, Rơ Măm mờ Hrê dê kung bè ală jơi bơtiàn dùl êt nă cau ndai tŭ do geh tus rlau 54% khà kờp làng bol bơh càr dê.