Kah wơl bơta chờ hờp ală ngai tàm nùs nhơm jơh gùt lơgar hô hơng wèt tus tơngkah kir sơnrai 78 nam Ngai Sơntờm Dà lơgar 02/09/2023, ùr bơklau ồng Hoàng Minh Lý, 79 sơnam, ơm tàm thôn 8, xã tiah nhàr lơgar Ea Bung, kơnhoàl Ea Súp kung gam ngoh rơngăc ờ gơtùi đơs ngan. Di dơ̆ do, 2 nă ùr bơklau ồng geh Pôs đồng ling sền gàr tiah nhàr lơgar Mpồng tiah nhàr lơgar Dăk Ruê bal mờ bàr pe nă cau geh nùs nhơm niam jàu pà dồ nơm “hìu ơm ram mhŭ tiah nhàr lơgar” kờp priă 80 tơlak đong.

Ồng Tâm kah wơl, tàm sơnam neh dờng mờ gơtìp kòp tê jê să sùm bè do, broă geh dồ nơm hìu ơm dờng niam bè do là bơta kơ̆p kờñ bơh jơh rài kis ồng dê: “Añ chờ hờp ngan, chờ hờp tài bơh ală kwang bàng cau ling mpồl ling sền gàr tiah nhàr lơgar neh hòi jà ală cau dong kờl jơh nùs jơh tồr ngan tus mờ hìu bơnhă añ mờ lơh añ in dồ nơm hìu ơm ram mhŭ tiah nhàr lơgar. Tŭ mờ lơh jơh hìu rao, añ mut ơm tàm hìu den ờ gam kơlôi rcang ngòt hìu sèt mìu ñhăt, càl hềr tai. Añ geh hìu ơm dờng niam nàng ơm kis rơ̆p pràn kơl dang mờ kis jŏ rlau tai”.

Ea Bung là dùl tàm 3 xã tiah nhàr lơgar bơh kơnhoà Ea Súp dê. Jơh gùt xã tŭ do geh 1 rơbô 053 hìu bơnhă mờ rlau 4 rơbô 100 nă cau, gơwèt 8 jơi bơtiàn oh mi ơm kis bal. Lơngăp lơngai rơndăp tăp sèng tàm tiah do sùm geh gàr kơ̆ kơl jăp, rài kis làng bol dê ngai sơlơ geh bơtàu tơnguh rlau. Ồng Trần Thanh Thản, Củ tịc Ủy ƀan Mặt trận Dà lơgar Việt Nam xã Ea Bung đơs: lơh geh cồng nha do bơnah lơi là kơnờm tàm bơta dong kờl bơh mpồl ling Pôs đồng ling sền gàr tiah nhàr lơgar Mpồng nhàr lơgar Dăk Ruê dê: “Pah nam ală kwang bàng, cau ling pờ ală dơ̆ lam lơh srơh sền gàr lơngăp lơngai Dà lơgar tiah nhàr lơgar, mờ lam lơh pờ ală ơdŭ pơlam tàp ai làng bol in dong kờl làng bol lơh broă sa bè sơntìl kòi lơh geh cồng nha uă, bơta chài ròng siam kơnrồ me. Mờ tàm ală dơ̆ lơh chờ, dơ̆ Sa Tềp pah nam mpồl ling ndrờm tus lùp còp, pà phan ai ală hìu bơnhă rƀah, broă lơh dong kờl nàng pơndờm pơnđiang làng bol chờ hờp wă rò sa Tềp geh ram mhŭ mờ chờ hờp”.

Pôs đồng ling sền gàr tiah nhàr lơgar mpồng nhàr lơgar Dăk Ruê lơh jat broă atbồ sền gàr gơl gùng tiah nhàr lơgar pơgap 8 kơi sồ mờ tiah nhàr sồ 42 gơwèt ù tiah xã tiah nhàr lơgar Ea Bung, kơnhoàl Ea Súp, càr Dăk Lăk, rềp nhàr bal mờ càr Muldulkiri, lơgar Campuchia. Thượng tá ồng Phạm Đức Khá, Cíñ trị viên Pôs đồng ling sền gàr tiah nhàr lơgar Mpồng nhàr lơgar Dăk Ruê pà gĭt, ală nam pa do, bal mờ kơnòl broă sền gàr kơ̆ kơl jăp gơnoar tờm lơngap lơngai tiah nhàr lơgar bơh Dà lơgar dê, ală Kwang bàng, cau ling bơh Pôs đồng gam bơt bơtàu kơ̆ kơl jăp nùs nhơm rcang làu bơh làng bol dê.

Mờ gùng dà broă lơh  “Pôs đồng là hìu, tiah nhàr lơgar là ƀòn lơgar tờm, làng ală jơi bơtiàn là oh mi pròc mhàm bal”, mpồl ling neh lơh geh cồng nha broă lơh dong kờl gàr niam rài kis mpồl bơtiàn bơh ală broă lơh, bè: dờp ròng siam Mè Việt Nam khin cha jak chài, “Kòn ròng Pôs đồng ling sền gàr tiah nhàr lơgar dê, “Dong kờl oh lòt bơsram”, ngai chờ klơm ƀañ mhar lơm pòng, lơh hìu ơm ram mhŭ tiah nhàr lơgar, dong kờl ală broă lơh bơtàu tơnguh lơh sa tơn jơh jơgloh tơrmù rƀah. Bal mờ hơ̆, mpồl ling gam jơh nùs lơh broă tàm ƀòn lơgar, dong kờl Đảng ủy, gơnoar atbồ ală tiah lơh phan bơna bơt bơtàu ƀòn lơgar pa, cribơyai bơt bơtàu ală Ci ƀộ ngai sơlơ kơ̆ kơl kăp, tơl làm, lơh geh cồng nha broă lơh bơh Đảng mờ Dà lơgar dê. Thượng tá ồng Phạm Đức Khá pà gĭt:“Tŭ do bol añ geh 16 nă đảng viên tàm mpồl lơh broă tus bal pơrjum ing tàm 6 Ci ƀộ tàm ală thôn; mờ 16 nă kwang bàng geh jàu kơnòl broă drơng broă ai ală hìu bơnhă rƀah tàm tiah nhàr lơgar in. Bơh mpồl do, bol añ sùm sồr lơh broă niam tàm ală Ci ƀộ ƀòn lơgar nàng lơh jat ală Nghị quyết bơh xã dê lơh bè lơi ai rềp ngan mờ bơta geh ngan dê. Bơh hơ̆, cribơyai ai kấp ủy ală kấp in nàng bal mờ ală tiah bơt bơtàu xã ngai sơlơ dờng pràn, làng bol tàm ù tiah tiah nhàr lơgar ngai sơlơ geh rài kis hờm ram mờ chờ hờp chờ hờñ rlau tai”.

Bơta dong kờl bơh mpồl ling sền gàr tiah nhàr lơgar dê neh pơgồp bơnah dong xã Ea Bung in gơ gơs xã tiah nhàr lơgar sơnrờp tàm càr Dăk Lăk lơh sir broă lơh ƀòn lơgar pa tàm nam 2021. Rài kis ngai sơlơ geh bơtàu tơnguh, làng bol jơh nùs tus bal mờ mpồl ling sền gàr tiah nhàr lơgar sền gàr lơngăp lơngai rơndăp tăp sèng, atbồ, sền gàr kơ̆ kơl jăp gơnoar tờm, lơngăp lơngai tiah nhàr lơgar dê.