Tus bal broă lơh, làng bol kòn cau Jêh Triêng tàm thôn Nông Kon đơs is mờ xã Đăk Dục đơs bal neh tìp mat lơh kwèng, dròng uă jơnau cing, tamya xoang yau, pơrlòng klơm, gơm mbar lơm pòng; jòi git, yal tơnggit bè sa tềp bơhiàn yau jơi bơtiàn dê; chờ hờp bal tàm mang sing ồs lơh chờ ờs mờng… 

Di dơ̆ do, mờ gơnoar broă là mpồl đơng lam, Gah đơng lam mpồl ling sền gàr tiah nhàr dà lơgar càr Kon Tum bơyai lơh sơn đờm ai ngui, jàu broă lơh Hìu rông niam chài thôn Kông Kon. Hìu rông niam chài thôn Nông Kon geh lơh wơl bè ờs jat bơhiàn bơh yau cau Jêh Triêng dê, kờpjơh priă tă lơh mờr 145 tơlak đông.

Tàm broă lơh “Nam pa sền gàr tiah nhàr dà lơgar ram nùs làng bol ƀòn lơgar”, Gah đơng lam Mpồl ling sền gàr tiah nhàr dà lơgar càr Kon Tum pơgồp bal mờ ală anih lơh broă, mpồl lơh broă jàu pà 600 nơm bồng bi dà lơgar ai làng bol xã tiah nhàr dà lơgar Đăk Dục in, pà 1 nơm hìu tam klac dờng kờp priă 50 tơlak đông, 30 bơnah phan pà ai hìu bơnhă geh sră dong kờl bơh dà lơgar, hìu bơnhă rƀah in; pà sră jờng rơ, pà phan bơh Gah đơng lam Mpồl ling sền gàr tiah nhàr dà lơgar dê ai 10 nă sau gơ wèt Rơndap broă lơh “Dong oh tus hìu bơsram” geh cồng nha jak ngan tàm broă bơsram sră”.