Càr Dăk Lăk tŭ do geh di pơgăp 150 Hợp ták xã (HTX) lơh sa suơn sre, rơlao 270 suơn, wàng ròng phan mờ rơlao 15 rơbô 500 hìu làng bol lơh broă sa pơgồp bal lơh geh uă bơta kwơ ai ală gah tus bal in. Ală mpồl lơh sa kă bro, HTX geh ai tơl phan kơl jăp, niam; bơsong broă tăc phan geh lơh ai làng bol lơh broă sa in bơh ală broă pơgồp bal, ai broă lơh ală làng bol in. Bal mờ hơ̆, broă pơgồp bal ai geh ală phan kloh, niam, ală anih lơh gơs loh làng nàng cau ngui sa in, ai broă lơh cau lơh broă in. broă ngui ală bơta chài gơguh jăk tàm lơh sa suơn sre dong kờl tơmù bơta gơrềng ờ niam tus mờ tiah kis.

Pa do, UɃÑZ càr Dăk Lăk neh bơyai lơh pơrjum sền wơl 5 nam lơh jăt Nghị địñ sồ 98 nam 2018 bơh Cíñ phủ dê. Tàm pơrjum, ală kwang bàng neh pơgồp jơnau đơs, ai geh ală broă lơh nàng lơh jăt ală rơndăp broă, broă rơndăp lơh pơgồp bal mờ kă bro phan geh lơh bơh suơn sre geh cồng nha rơlao. Ồng Huỳnh Bài, Củ tịc Mpồl tam klăc HTX càr Dăk Lăk geh jơnau đơs: “Mpồl tam klăc HTX càr kơ̆p kờñ geh broă sền gròi bè broă bơto cau lơh broă, dơ̆ bàr là ai tơl bơta ƀuơn nàng ală HTX in geh ù bơtàu tơnguh ală phan geh lơh kung bè lơh ală anih prăp, ală ƀlàng ìs nàng drơng tàm broă lơh sa. Gơwèt mờ ală kấp gơnoar atbồ kung bè mpồl lơh sa kă bro geh broă pơgồp bal jòi geh anih tăc nàng phan geh lơh bơh HTX geh bơta kơl jăp”.

Ồng Huỳnh Bài kung pà git, pa do Mpồl tam klăc HTX càr Dăk Lăk neh bơyai lơh ai ngui hìu ràng tăc, yal phan geh lơh bơh ală mpồl lơh broă, HTX mờ ală phan OCOP. Hìu tăc phan geh lơh tàm hìu sồ 88 gùng Điện Biên Phủ, sơnah ƀòn Thành Công, ƀòn dờng Buôn Ma Thuột, ràng tăc 151 bơta phan bơh 25 HTX tàm càr dê. Hìu ràng tăc ală bơta phan bơh mpồl lơh broă bal, HTX mờ ală phan OCOP geh là anih tơrbŏ bal kă bro geh cồng nha đah ală HTX mờ ală gah lơh broă bal blơi phan geh lơh, tam pà mờ cau ngui sa.

Pa do, UɃÑZ càr Dăk Lăk kung neh bơyai lơh tơn jơh ing 3 nam lơh jăt Broă rơndăp lơh bơtàu tơnguh lơh sa mpồl, HTX tơngai bơh nam 2021 tus 2025 mờ Broă lơh bơh UɃÑZ càr lơh jăt jơnau đơs pơn dŭt bơh Ƀộ Cíñ trị dê bè broă pơn jăt tai tam gơl pa, bơtàu tơnguh mờ tơnguh cồng nha lơh sa mpồl tàm tơngai pa.

Tàm 3 nam sơnrờp lơh jăt broă rơndăp lơh bơtàu tơnguh lơh sa mpồl, HTX, càr Dăk Lăk neh dong kờl lơh pa 57 HTX; dong kờl ală HTX măi mŏk, phan lơh broă, ngui bơta tam gơl kông nghệ, bơ̆t bơtàu khà măt kă bro, bơ̆t bơtàu mpồl lơh sa suơn sre tờm càr dê… mờ kờp jơh priă tă lơh rơlao 6 tơmàn đong. Ală broă lơh ndai bè dong kờl ai cau lơh broă kơnòm să tus lơh broă tàm tiah lơh sa mpồl; tơmù ha là ờ tă priă tă dia ù, lời ing dồs, tơn jơh dồs priă tă dia; dong kờl bơcri priă bơ̆t bơtàu phan bơna lơh gơs phan ai HTX lơh sa suơn sre in… geh ală kấp, gah lơh broă, ală kơnhoàl, thị xã mờ ƀòn dờng lơh jăt bal. Kes priă bơtàu tơnguh HTX càr Dăk Lăk neh bơcri ai 32 HTX in càn rơlao 19 tơmàn đong; Kes priă dong kờl ai broă lơh gam ai 8 HTX in càn rơlao 1 tơmàn đong.

Ồng Nguyễn Thiên Văn, Phó Củ tịc UɃÑZ càr Dăk Lăk pà git, geh uă HTX, mpồl lơh broă tàm càr do geh broă lơh dềt, ờ uă priă, broă lơh ờ dờng; bơta pràn pơgồp bal gam ờ uă. Nàng lơh geh jơnau kờñ tus nam 2030, càr geh di pơgăp 800 HTX mờ 1 rơbô mpồl lơh broă bal, ồng Nguyễn Thiên Văn pà git: “Tàm tơngai tus pal lơh pràn rơlao tai broă lơh, lơh niam HTX di jăt Adăt HTX nam 2012 mờ tus do ngai 01 nhai 7 nam 2024 geh lơh jăt Adăt HTX nam 2023. Tàm Adăt HTX nam 2023 geh 8 mpồl dong kờl mờ gah lơh sa mờ măi mŏk geh dong kờl krơi is. Den tàng Kấp ủy, gơnoar atbồ ală Sở, Gah lơh broă tàm càr pal sền gròi ai lài priă nàng dong kờl làng bol bơh mpồl lơh broă ala măt làng bol dê, geh bè hơ̆, hơ̆ sồng broă ngui bơta tam gơl sồ, ngui bơta gơguh jăk khoa họk mờ kông nghệ, ngui ală kơrnoăt di pal, ală bơta geh niam bè jơnau kờñ tàm lơh sa bơh tơl gah phan dê, bè hơ̆, hơ̆ sồng geh tam gơl tàm càr”.

Gơtùi đơs tờm, ală nam do lơh sa mpồl tàm càr Dăk Lăk neh bơtàu tơnguh bè khà geh bal mờ tơnguh uă bè bơta niam, pơgồp bal uă ngan tàm broă tam gơl lơh sa, tơnguh uă bơta kwơ phan geh lơh, pơgồp bal tàm broă tam gơl muh măt ƀòn lơgar dê.