Ồng Nguyễn Tài kis tàm thôn 15, xã Ea Yông, kơnhoàl Krông Păc, càr Dăk Lăk tŭ tus lơh sră nggal tàm bơnah “Dùl mpồng” tàm Ủy ƀan Ñân zân (UɃÑZ) xã Ea Yông. Ồng Nguyễn Tài đơs là, broă ală kấp, gơnoar atbồ lơh pràn broă lơh niam sră nggal tơngai do neh cèng geh bơta kwơ mùl màl ai làng bol, mpồl lơh broă, mpồl lơh sa kă bro in. Tàm hơ̆, bơta niam geh dờp gŏ ngan là broă lơh “Pang Zalo tơrbŏ bal gùt làng bol” tàm broă bơsong sră nggal tàm xã do dê. “Tŭ añ tus lơh broă nggal tàm anih lơh broă sră nggal xã dê. Añ gŏ do là broă lơh jăk ngan mờ broă drơng lơh broă jơh nùs bơh ală kwang bàng tàm anih lơh broă sră nggal xã dê. Tŭ làng bol kờñ geh jơnau lùp bè ală sră nggal den gơtùi lùp tơn tàm mpồl Zalo”.

Bal mờ broă lơh “Pang Zalo tơrbŏ bal gùt làng bol”, tơngai do, ală broă lơh bè: “Ngai dơ̆ poan pờ tơlik tàm internet”, “Ngai ờ cih”, “Ngai ờ pơrgon” neh geh ală tiah tàm càr Dăk Lăk lơh jăt niam jơh ală sră nggal. Tŭ làng bol tus tàm anih lơh broă “Dùl mpồng” nàng lơh ală sră nggal bè lip geh wơl bè ờs, lơh cơng mùl màl sră pơ-àr, sră nggal; lơh sră gùng tam bao; sră nggal dan yal ngai deh kòn mờ sră nggal yal cau chơ̆t geh lơh tơn mờ broă lơh 5 gơl: pơlam, dờp, bơsong, kĭ mờ jào cồng nha. Mò Nguyễn Thị Thuý Sinh, kwang bàng Cơl dŭ lơh broă – Kờp sền UɃÑZ xã Ea Yông, kơnhoàl Krông Păc, càr Dăk Lăk pà git: “UɃÑZ xã neh lơh uă broă tơrlòng lơh nàng lơh tus mờ làng bol in. Pơgồp bal mờ mpồl đơng lam rơndăp broă 06, mpồl đơng lam lơh niam sră nggal lơh jăt broă tơrlòng lơh “1 rơbô nă làng bol sồ” tàm xã Ea Yông dê. Làng bol tŭ tus lơh ală sră nggal tàm xã den gơtùi jào sră tàm internet nàng tơmù priă tă mờ tơmù tơngai”.

Broă lơh jăt ală broă tơrlòng lơh neh gơmù tàm tơngai bơsong ờ uă sră nggal kấp xã, sơnah ƀòn. Làng bol mìng kờñ tus dùl dơ̆, kơ̆p tàm tơngai ờ jŏ nàng dờp cồng nha. Ală broă tơrlòng lơh do ờ mìng dong kờl tơnguh uă sră nggal kấp xã, sơnah ƀòn geh bơsong di tơngai, dong kờl làng bol, mpồl lơh sa kă bro tơmù tơngai, priă tă tàm broă lơh sră nggal mờ gam bơ̆t bơtàu mpồl kwang bàng, kông cứk geh kơnòl, nùs nhơm niam tàm tŭ drơng broă. Ồng Nguyễn Thanh Vũ, Củ tịc UɃÑZ kơnhoàl Krông Ana kơlôi sơnơng mờ đơs: “Broă tam gơl pa, bơceh lơh tàm broă lơh sră nggal, cau atbồ ală anih lơh broă đơng lam sùm broă sền gròi, pơlam, kwang bàng, kông cứk lơh jăt kơnòl broă nền nòn di pal mờ kơrnoăt tàm adăt boh lam neh geh ai bơh anih lơh broă dê mờ dờp geh jơnau đơs bơh làng bol dê bè nùs nhơm niam tŭ lơh broă kung bè jơnau đơs bơh kwang bàng dê gơwèt mờ làng bol”.

Jăt jơnau đơs tàm “Pơrjum tơn jơh ing 9 nhai bè broă lơh niam sră nggal bơh càr Dăk Lăk dê tàm nam 2023”, bơh broă tus ndrờm bal, pràn bơh ală gah, mpồl lơh broă tàm tơngai do neh dong kờl broă lơh niam sră nggal bơh càr dê geh gơguh niam, drơng niam rơlao jơnau kờñ bơh làng bol mờ mpồl lơh sa kă bro. Broă dờp, bơsong sră nggal gơwèt gơnoar atbồ bơh càr dê geh lơh niam, tơmù tơngai jơla jăt mờ tơngai pơrgon tàm broă bơsong sră nggal; nền nòn lơh jăt broă dan să làng bol, mpồl lơh broă tŭ gơtìp jơla jăt mờ tơngai pơrgon. Jăt jơnau kờp pà gŏ, cồng nha bơsong sră nggal di tơngai, lài mờ tơngai tàm càr Dăk Lăk geh rơlao 99%. Nàng pơn jăt tai mờ jơnau kờñ “Ai làng bol mờ mpồl lơh sa kă bro lơh tờm nàng drơng broă”, ồng Nguyễn Tuấn Hà, Phó Củ tịc UɃÑZ càr Dăk Lăk đơs nền. “Tàm tơngai tus geh bơyai lơh dùl dơ̆ Pơrjum nàng sền wơl broă lơh kung bè bơta kal ke gơtìp nàng geh gùng dà đơng lam bơsong bơta kal ke. Dơ̆ bàr là sền wơl, kờp nàng ring bal khà sră nggal geh yal loh làng tàm tơngu me zữ liệu dà lơgar. Dơ̆ pe là đơng lam, pơlam nàng UɃÑZ càr geh sră nggal đơng lam lơh jăt ală kơnòl broă lơh niam sră nggal bơh tŭ do tus jơ nam 2023. Sền wơl jơh ală broă lơh drơng ala tàm internet nàng bơh tŭ hơ̆ geh rơwah ală broă lơh drơng ala mùl màl geh kwơ, bơta niam ngui geh uă, pơgồp bal mờ broă kờñ pah ngai bơh làng bol, mpồl lơh sa kă bro dê”.

Broă càr Dăk Lăk lơh ngan lơh pràn broă lơh niam sră nggal geh sền là broă tam gơl kwơ màng, ai geh bơta pràn nàng càr bơtàu tơnguh mhar mờ kơl jăp, di pal mờ jơnau kờñ bơtàu tơnguh bal di jăt mờ Nghị quyết sồ 23 ngai 06 nhai 10 nam 2022 bơh Ƀộ Cíñ trị bè gùng dà bơtàu tơnguh lơh sa mpồl bơtiàn mờ gàr niam dà lơgar, bơta lơngăp lơngai tiah Tây Nguyên tus nam 2030, wèt tus nam 2045.