Bơh rơlao jơ̆t ngai lài, bi Nguyễn Xuân Lộc, gam pơrjum tàm hìu yàng Ea Tul, xã Ea Tul, kơnhoàl Cư̆ Mgar bal mờ ală cau jăt yàng bàp neh tus bal bơka hìu yàng, nền nòn mờ ală pơnai gòng, lir tơl pơnai tềng rơgồng lŭ dờng geh lơh tềng gah hìu yàng dê. Cau crăp che ồs đèng, cau duĭ che ồs đèng, cau lơh niam wơl rơgồng lŭ, geh cau bơka mpồng hìu yàng, cau lơi kung chờ hờp lơm. Bi Nguyễn Xuân Lộc đơs: “Tàm nùs nhơm chờ hờp wă rò Kơnràñ lik lìng añ kung bè ală cau dê sơl tàm mpồl cau jăt yàng bơh hìu yàng Ea Tul do, bơka niam ală rơgồng lŭ nàng chờ gờm kơnràñ lik lìng, nàng ală cau geh dùl kàl Noel lơngăp lơngai, añ gŏ gơlơh chờ hờp ngan”.

Tơngai do, bŭ lah gam ờ ru mờ broă pĭc plai kơphe, mơya làng bol jăt yàng bàp tàm do cau lơi kung gam ai tơngai nàng bơka, pơs wàs kloh niam hìu đam, chờ gờm wă rò Noel mờ nam pa gam mờr tus. Lŏ Hly Ktala, kis tàm xã Ea Tul, kơnhoàl Cư̆ Mgar chờ hờp yal, nam do priă tăc ală bơta phan geh lơh bơh suơn sre ndrờm gơguh, priă geh uă den tàng làng bol rơcang wă rò Noel tàm nùs nhơm chờ hờp ngan. Lŏ, đơs: “Nam do hìu añ kung rơcang lơh rơgồng lŭ nàng wă rò kơnràñ lik lìng. Nam do is mờ ală nam tài priă tăc kơphe gơguh, hơ̆ là bơta chờ dờng ngan den tàng nam do cau lơi kung chờ lơm”.

Bèp yàng Hoàng Nguyên Vũ atbồ hìu yàng Ea Tul pà git, Noel nam do cau jăt yàng geh bơta chờ uă ngan tŭ hìu yàng gam geh bơcri priă lơh pa. Rơcang Noel nam do, bơh bồ nhai 12, làng bol jăt yàng bàp neh tă bal ngai lơh broă, tă priă nàng bal mờ bèp yàng mờ mpồl duh broă tàm hìu yàng rơcang ai Ngai Noel in lơngăp lơngai, nền nòn, tơlik nùs nhơm “Sàng goh gùng Yàng, gơboh dà lơgar”, tam klăc jơi bơtiàn.

Bèp yàng Hoàng Nguyên Vũ đơs: “Noel nam do kung rơcang broă lơh nàng ai tơngŏ wơl bè rài kơnràñ lik lìng lài do, hơ̆ sồng lơh yàng. Gơwèt mờ làng bol den dơ̆ lơh yàng di Kơnràñ lik lìng là lơh yàng dờng ngan, den tàng nùs nhơm chờ gờm dơ̆ lơh yàng bơh làng bol dê kung niam ngan. Tàm hơ̆ tàm Ea Tul do hìu lơi kung bè hìu hơ̆ ndrờm lơh rơgồng lŭ lơm nàng chờ gờm kơnràñ lik lìng, nùs nhơm làng bol den chờ hờp ngan. Nam do geh gơnoar atbồ ală kấp ai lơh hìu pa, do kung là bơta chờ bơh làng bol dê den tàng làng bol chờ hờp ngan, lơh is hìu yàng mờ ờ pal apah cau lơi”.

Kơnhoàl Cư̆ Mgar geh 5 hìu yàng dờng, 2 hìu yàng dềt mờ 1 anih pơrjum, ồng Vũ Hồng Nhật, Củ tịc Ủy ƀan Ñân zân kơnhoàl Cư̆ Mgar pà git, kàl Noel nam do, kơnhoàl neh lơh geh 5 mpồl kwang bàng nàng tus còp să, pà phan mờ chờ gờm ală hìu yàng, cau kơ đơng yàng. Mờ sồr ală xã, thị trấn hòi jà ală cau dong kờl nàng còp să, pà phan ală hìu nhă cau jăt yàng geh rài kis gơtìp kal ke, dong kờl làng bol wă rò dùl kàl Noel lơngăp lơngai, ram mhŭ. Ồng Vũ Hồng Nhật đơs: “Kàl Noel nam 2023 do, UɃÑZ kơnhoàl sồr ală xã, sơnah ƀòn, thị trấn geh hìu yàng drơng làng bol in wă rò kàl Noel nền nòn, lơngăp lơngai tàm bơta là lơh jăt ală kơrnoăt adăt boh lam bơh dà lơgar dê mờ tàm hơ̆ uă ngan là drơng ai ală hìu làng bol jăt yàng rơƀah, dong kờl wă rò dùl kàl Noel hờm ram, gơboh gơbài”.

Ồng Dương Văn Tuệ, Phó Củ tịc Duh broă sùm Ủy ƀan Tam klăc bal cau jăt yàng Bàp càr Dăk Lăk pà git, gùt càr geh 100 hìu yàng mờ rơlao 217 rơbô nă cau jăt yàng. Nam 2023 rài kis làng bol jăt yàng Bàp tàm càr geh gơguh uă ngan. Ală broă lơh nùs nhơm dong kờl; ală broă lơh sền gàr bơta lơngăp lơngai tàm ală Hìu yàng; broă lơh “Gùt làng bol tam klăc bơ̆t bơtàu ƀòn lơgar pa mờ gơguh jăt ƀòn drà”… ndrờm geh làng bol jăt yàng Bàp dờp bal lơh mờ pơgồp bal tàm broă bơ̆t bơtàu càr Dăk Lăk ngai sơlơ pas gơs mờ niam bơnĕ. Ồng Dương Văn Tuệ, đơs: “Nam 2023 làng bol jăt yàng bàp neh tàm pơrlòng bal lơh sa nàng bơtàu tơnguh lơh sa, tơnguh rài kis hìu nhă. Nùs nhơm chờ gờm Noel gam geh chờ hờp tàm ală hìu yàng mờ ƀòn ơm kis tàm uă tiah tàm càr. Dùl nùs nhơm chờ hờp gam geh uă tàm làng bol jăt yàng tàm ƀòn dờng kung bè ală tiah ngài”.

Dùl kàl Noel tai neh tus tàm nùs nhơm chờ hờp bơh làng bol jăt yàng bàp càr Dăk Lăk dê. Cau lơi kung wèt tus jơnau kơ̆p kờñ mờ răc dan geh dùl kàl Noel lơngăp lơngai, dùl nam pa geh uă bơta chờ mờ gơboh gơbài.