Tơnơ̆ tŭ tơn jơh dơ̆ pơrlòng jơh bơsram kâp pe nam 2023, mho ngai 29/06, Sở Giáo zụk mờ Đào tạo càr Dăk Lăk bơyai lơh pơrjum ƀăo yal bè dơ̆ pơrlòng. Jăt mờ hơ̆, tàm ù tiah càr Dăk Lăk kờp jơh geh 142 rbô nă kơnòm pơrlòng lơh sră cih mat dan pơrlòng tàm 12 môn pơrlòng, khà lòt pơrlòng geh 99,58%, geh 598 nă kơnòm pơrlòng sơrbì pơrlòng.

Jăt mò Lê Thị Kim Oanh, Phó Kwang ătbồ Sở Giáo zụk mờ Đào tạo càr Dăk Lăk dê yal, dơ̆ pơrlòng nam do neh geh lơh niam mờ lơngăp lơngai tŭ ờ gŏ geh kơnòm pơrlòng mờ kwang bàng sền pơrlòng lơi lơh tìs kơrnoăt pơrlòng. Broă lơh pơgồp bal đah ală mpồl cau geh gơnoar niam ngan, ngan là broă lơh sền gàr niam lơngăp lơngai bơh mpồl kwang àng dê tàm jơh ală tŭ tơngai geh lơh dơ̆ pơrlòng.