Dơ̆ pơrlòng jơh bơsram kấp pe dà lơgar nam 2023 tàm poh tus, gùt càr Dăk Lăk geh rlau 21 rơbô nă cau pơrlòng cih mat dan tus bal pơrlòng tàm 33 tiah pơrlòng mờ kờp jơh geh 900 cơldŭ pơrlòng. Gàr niam ồs đèng kơ̆ kơljap ai dơ̆ pơrlòng in, ală mpồl lơh broă gah ồs đèng Dăk Lăk neh lơh broă lơh lòt sền jơh gùt gùng che ồs đèng, geh uă broă rơndap lơh pờ ồs đèng ai ală tiah in drơng broă pơrlòng.

Jat hơ̆, ală mpồl lơh broă sơlơ tơnguh broă lòt sền, gàr niam ală gùng che ồs đèng, trạm biến áp geh gơrềng tus broă pờ đèng ai ală tiah in, sao jơnau pơrlòng in, ală tiah bơyai lơh pơrlòng mờ tiah ai điềm pơrlòng; kung bè pơgồp bal bơsong ală bơta nisơna gơlik geh pơhìn tus broă pờ ồs đèng. Gah lơh broă ồs đèng kung ai mpồl lơh broă ơm lơh broă tai jơh ngai mang mờ tơl làm rơndeh rơndồ măi mok, phan bơna, măi mok nàng bơsong di tŭ ală bơta aniai digơlan gơlik geh. Mờ ală mpồl lơh broă ồs đèng kung rcang lài lơh broă, pơgồp bal mờ ală anih lơh broă geh gơnoar ală tiah dê nàng sơlơ tơnguh ală broă lơh sền gàr lơngap lơngai drơng broă ai dơ̆ pơrlòng in.