Ngai lồi nhai 10, geh mờr 20 nă kwang bàng, cau ling Kảñ sát Rơcang sơndră Crùh ồs sa mờ Dong klàs cau gơtìp rềs àr gơwèt Kwang àng càr Dăk Lăk bal mờ ala măt ală hìu geh măt tềng ƀlàng Hìu B Hoàng Anh, gùng Nguyễn Công Trứ, ƀòn dờng Buôn Ma Thuột nàng bơsram tàp rơcang sơndră mờ ồs sa gơlik geh hờ đang cờn ñhoa hìu do. Ală cau tus bal geh bơto sồr tàm broă ngui khàr crùh ồs, ding ƀồm dà gơsơ̆t ồs, ngui ntùng che dong klàs ală cau gơtìp kòl tàm tiah ồs sa, sơm ală cau gơtìp aniai…

Ồng Bùi Huy Phước, Ala măt Mpồl atbồ broă ngui hìu ơm bal Hoàng Anh pà git, pah nam mpồl lơh sa kă bro ndrờm bơyai lơh sùm, bơsram tàp broă rơcang sơndră ồs sa mờ Dong klàs cau gơtìp rềs àr tàm ală hìu ñhoa cờn ơm kis bal. Bơdìh hơ̆ tai gam mblàng yal, lam sồr ală cau lơh jăt nền nòn ală kơrnoăt mờ crăp tơl ală phan rơcang sơndră mờ ồs sa. “Mpồl atbồ hìu ơm bal pơgồp bal mờ mpồl rơcang rơndră mờ crùh ồs sa lài ngan là mblàng yal mờ dơ̆ bàr tai là hòi jà ală hìu làng bol geh lơh pơngàr ờ geh mpồng lik den pal mhar lơh mpồng lik. Tàm dơ̆ pa do den geh uă làng bol neh lơh, mìng gam geh ờ uă hìu ờ hềt lơh mờ ờ geh măt tàm tơngai do den bol añ pơn jăt tai lam sồr nàng ală hìu do lơh tŭ neh rê, nàng tŭ gơtìp bơta ờ niam den he lik klàs niam ai să tờm mờ cau tàm hìu in”.

Bi Nguyễn Tuấn Anh, dùl nă làng bol kis tàm hìu ñhoa cờn Hìu B Hoàng Anh-Buôn Ma Thuột bơh mờr 10 nam do yal, broă làng bol ơm kis tàm do geh rơcang jơnau git wă, bơsram tàp jơnau git wă tàm broă rơcang sơndră mờ ồs sa tàm hìu ơm bal ñhoa cờn là pal geh lơh ngan. Nàng tŭ gơtìp bơta ờ bơtoah gơlik ồs sa, ală cau ndrờm ờ dơrcul nùs, ngui bơta git wă tàm broă rơcang ai să tờm, pơgồp bal mờ mpồl lơh broă geh gơnoar nàng rơcang sơndră mờ ồs sa bal mờ dong kờl ală cau nàng lik klàs mờ bơta ngòt rơngơ̆t bal.

Bi Nguyễn Tuấn Anh pà git: “Hìu añ kung tus bal mờ broă bơsram tàp sơndră mờ crùh ồs sa, bal mờ blơi is ală bơta phan rơcang sơndră mờ ồs sa tàm hìu nàng tŭ gơtìp geh bơta mờ niam den gơtùi bơsong mờ lik klàs is să tờm. Añ gŏ broă bơsram tàp rơcang sơndră crùh ồs sa do là geh kwơ, kung kơ̆p kờñ jơh ală làng bol ndai kis bal tàm hìu do pal geh tus bal tơl nàng mpồl rơcang sơndră crùh ồs sa mờ dong klàs cau gơtìp rềs àr bơto nàng git mờ tŭ gơtìp geh bơta ờ niam den geh pơgồp bal nàng rơcang sơndră mờ crùh ồs sa mờ lik klàs tŭ gơtìp rềs àr”.

Jăt jơnau yal bơh mpồl Kảñ sát Rơcang sơndră crùh ồs sa mờ Dong klàs cau gơtìp rềs àr gơwèt Kwang àng càr Dăk Lăk yal, bơh nggùl nhai 12 nam 2022 tus tŭ do, tàm càr Dăk Lăk neh gơtìp 17 dơ̆ ồs sa, lơh 1 nă cau gơtìp chơ̆t, sồt să git nđờ jơ̆t nă cau, lơh hoàc huơr bè phan bơna mờ priă kờp tus rơlao 5 tơmàn 550 tơlăk đong. Khà dơ̆ ồs sa pơn drờm mờ tŭ do nam lài gơmù 03 dơ̆, mơya khà gơtìp aniai gơguh uă, khà cau sồt să uă rơlao. Mpồl lơh broă geh gơnoar neh bơyai lơh yal adăt boh lam, jơnau git wă tàm broă rơcang sơndră crùh ồs sa mờ dong klàs cau gơtìp rềs àr ai git nđờ rơbô nă cau in; pờ geh 101 ơdŭ bơto bè broă rơcang sơndră crùh ồs sa mờ dong klàs cau gơtìp rềs àr ai di pơgăp 9 rơbô 300 nă cau sền gàr ƀòn lơgar, mpồl rơcang sơndră mờ crùh ồs sa tàm ală tiah in.

Trung tá Phùng Việt Đức, Phó Kwang atbồ Cơl dŭ lơh broă Kản sát Rơcang sơndră crùh ồs sa mờ Dong klàs cau gơtìp rềs àr gơwèt Kwang àng càr Dăk Lăk đơs, broă geh git nđờ rơbô nă cau geh mblàng yal, lơh, bơsram tàp tàm broă rơcang sơndră crùh ồs sa mờ dong klàs cau gơtìp rềs àr geh tơnguh jơnau git wă bal mờ jơnau git gơrềng tus broă rơcang sơndră crùh ồs sa, lik klàs kung bè jơnau git bè broă sơm lài ngan cau gơtìp aniai in. Bơh tŭ hơ̆, tơmù ờ uă ngan hoàc huơr bè kòn bơnus bal mờ phan bơna tàm ală dơ̆ gơtìp ồs sa. Trung tá Phùng Việt Đức pà git: “Bơh ală dơ̆ bơsram tàp rơcang sơndră crùh ồs sa den làng bol mờ ală cau là kơnòm bơsram, cau bơsram dờng, cau lơh broă tơnguh uă jơnau git wă, kơnòl broă bơh să tờm tàm broă rơcang sơndră crùh ồs sa mờ git ală broă lơh tờm bè broă rơcang sơndră crùh ồs sa gơwèt mờ hìu ơm kis, hìu ơm bal, ală hìu ơm bal ha là hìu cau bơsram dờng ơm bal. Bơh broă lơh do, geh git ală bơta chài tàm broă rơcang sơndră ồs sa mờ tàm hơ̆ uă ngan là ală jơnau git wă tàm broă bơsong tŭ gơtìp ồs sa bơrtoh ha là ồs sa”.

Ồs sa bơrtoh là ală bơta rềs àr ờ geh cau lơi kờñ, mơya gơtìp ni sơna ngan mờ he ờ git lài. Broă geh jơnau git wă mờ lơh niam, nùs nhơm kơ̆ dơn tàm broă rơcang sơndră, gơsơ̆t ồs sa tơn tŭ pa gơtìp kung bè rơcang lài gùng dà lik klàs tàm ồs sa là bơta geh kwơ màng ngan gơwèt jơh mờ ală cau dê. Bơh tŭ hơ̆, di glơlan geh gơmù ờ uă ngan hoàc huơr bè kòn bơnus bal mờ phan bơna tŭ gơtìp ồs sa lơh aniai.