Oh Bùi Trần Diễm Quỳnh gam bơsram ơdŭ 9A1, hìu bơsram kấp 2 Trần Quang Diệu, xã Hòa Thuận, ƀòn dờng Buôn Ma Thuột. Oh yal, gùng lòt bơh hìu ơm tus hờ hìu bơsram jòng rơlao 2 kơi sồ, gơwèt gùng Hồ Chí Minh (Gùng Dà lơgar 14). Ngui rơndeh măi điện nàng lòt bơsram, oh sùm git gàr niam bơta lơngăp lơngai tàm gùng lòt: “Bơh hìu ơm oh lòt tus hờ hìu bơsram den geh lòt tàm gùng dờng. Oh neh lòt bơsram mờ rơndeh coh điện tus hờ hìu bơsram geh mờr 4 nam do, tŭ lòt den sùm lơh jăt nền nòn adăt gùng lòt ù gờl, ndao sơgơn gàr bồ, lòt di gùng, ờ lòt jờl sơrlèt ờ di… tŭ tus hìu bơsram den sền gròi, gàr niam bơta lơngăp lơngai tàm tiah hìu ơn rơndeh, rơndăp tăp sèng jăt gùng mờ tŭ rê den kung geh lơh bè hơ̆ sơl”.

Hìu bơsram kấp 2 Trần Quang Diệu, xã Hòa Thuận, ƀòn dờng Buôn Ma Thuột geh lơh tềng gah gùng Hồ Chí Minh ngài mờ drà Đạt Lý ờ hềt tus 200 thơ̆k. Bàr gah gùng tàm tiah do geh uă hìu tăc phan, den tàng uă nam do tàm tŭ geh gal cau là tiah tềng mpồng drà sùm gơtìp kòl gùng, lơh ờ niam tus mờ bơta lơngăp lơngai gùng lòt. Pơgru Nguyễn Văn Dũng, Kwang atbồ hìu bơsram pà git, hìu bơsram geh lơh uă broă lơh ndrờm bal nàng gàr niam bơta lơngăp lơngai gùng lòt ai 1 rơbô 400 nă kơnòm bơsram in, tàm hơ̆ uă ngan là tềng tiah mpồng hìu bơsram. “Jơh ală dơ̆ gờm chờ bồng bi bồ poh, hìu bơsram neh tam gơl ală dơ̆ bơsram mờ sră tềng đah đơm bồng bi mờ broă lơh lèo nàng mblàng yal tus mờ ală kơnòm bơsram lơh jăt Adăt gùng lòt ù gờl. Bơdìh hơ̆ tai, hìu bơsram kung neh sồr mpồl kờ đỏ pơgồp bal mờ dùl nă cau pơgru drơng broă tam pà gùng lòt ală kơnòm bơsram tềng mpồng hìu bơsram tŭ rê mờ bơto sồr kơnòm bơsram tàm broă lòt gan gùng niam. Mờ hìu bơsram kung geh dùl mpồng hờ đah tơnơ̆ hìu bơsram mờ tàm tŭ gal ir cau den geh pờ mpồng nàng kơnòm bơsram lik hờ đah tơnơ̆ nàng tam pà tơmù bơta gal ir cau”.

Trung tá Nguyễn Trọng Nghĩa, Phó Kwang atbồ Cơl dŭ lơh broă kảñ sát sền gàr gùng lòt gơwèt kwang àng càr Dăk Lăk yal, nàng gàr niam lơngăp lơngai gùng lòt tàm ală tiah mpồng hìu bơsram jăt gah ală gơl gùng dờng, tàm tơngai do, mpồl lơh broă neh sùm ai mpồl lơh broă tus tàm uă mpồng hìu bơsram nàng tam pà gùng lòt tŭ geh gal cau; mờ lơh ngan sền mờ bơsong nền nòn ală cau là kơnòm bơsram gơtìp tìs mờ kơrnoăt lơngăp lơngai gùng lòt bè broă măi rơndeh dờng rơlao 50 bơta pràn tŭ ờ hềt tơl sơnam, ờ ndao sơgơn gàr bồ, ờ hềt geh sră măi rơndeh, pơn diang uă ir cau jăt mờ kơrnoăt geh ai; lơh glài nền nòn ală cau mè bèp kơnòm bơsram bè broă ai rơndeh cau ờ hềt tơl sơnam in đì; pơgồp bal mờ ală hìu bơsram lơh broă lơh mpồng hìu bơsram lơngăp lơngai gùng lòt… Trung tá Nguyễn Trọng Nghĩa đơs: “Nàng gàr niam bơta lơngăp lơngai gùng lòt tềng ală mpồng hìu bơsram, Cơl dŭ lơh broă kảñ sát sền gàr gùng lòt Kwang àng càr Dăk Lăk neh pơgồp bal mờ ală hìu bơsram tàm ală gơl gùng dờng 14, 26 mờ 27 bal mờ kwang àng ală xã yal mblàng tus mờ kơnòm bơsram, cau mè bèp kơnòm bơsram, cau pơgru lơh jăt nền nòn Adăt gùng lòt ù gờl; lơh jăt broă pà sră, pano áp phíc nàng bơ̆t bơtàu broă lơh mpồng hìu bơsram đềt mềr, lơngăp lơngai. Bol añ ai kơnòm là pal lơh broă sùm rơlao, pràn rơlao”.

Càr Dăk Lăk tŭ do geh mờr 490 rơbô nă kơnòm bơsram bơh mầm non tus kấp 3, bơsram tàm 1 rơbô 6 hìu bơsram. Geh uă ngan ală hìu bơsram ndrờm rềp mờ ală gơl gùng 14, gùng 26, gùng 27 mờ ală gùng ndai lòt tus tàm ală kơnhoàl, thị xã mờ ƀòn dờng Buôn Ma Thuột, tiah geh gal rơndeh lòt tàm di gơlan gơtìp uă bơta rềs àr tàm gùng lòt. Ồng Phạm Đăng Khoa, Kwang atbồ Sở Giáo dụk mờ Đào tạo càr Dăk Lăk pà git, tơngai do bŭ lah mpồl lơh broă geh gơnoar, ală hìu bơsram neh lơh niam broă yal Adăt gùng lòt ù gờl tus mờ kơnòm bơsram bal mờ cau mè bèp, mơya nùs nhơm git wă tàm broă lơh jăt bơh ờ uă kơnòm bơsram bal mờ cau mè bèp kung gam ờ uă. Bơta gơtìp gal cau, ờ niam tàm gùng lòt tềng mpồng ală hìu bơsram kung gam gơtìp, tàm hơ̆ uă ngan là tŭ kơnòm bơsram lik rê. Nàng lơh niam bơta do, Sở neh pơgồp bal mờ gah lơh broă geh gơnoar yal mblàng, lam sồr cau mè bèp, kơnòm bơsram mờ làng bol tàm tiah do tơnguh uă rơlao tai broă lơh jăt adăt gùng lòt ù gờl; tŭ jun rò kơnòm bơsram pal lơh jăt jơnau bơto sồr bơh mpồl lơh broă geh gơnoar, cau lơh broă dong kờl, lơh geh uă broă lơh mpồng hìu bơsram lơngăp lơngai. “Nàng gàr niam bơta lơngăp lơngai tàm gùng lòt gơwèt mờ ală kơnòm bơsram, cau mè bèp bal mờ ală cau pơgru, Sở neh tơlik geh uă sră nggal bơto sồr ală hìu bơsram geh gùng dà broă lơh ndrờm bal nàng gàr niam bơta lơngăp lơngai tàm gùng lòt, tàm hơ̆ uă ngan là tàm tŭ gal kơnòm bơsram lòt mờ rê bơsram. Ală hìu bơsram tàm ală kơnhoàl, thị xã, ƀòn dờng kung pơgồp bal nền nòn mờ mpồl kản sát sền gàr gùng lòt nàng yal mblàng, bơto sồr, yal adăt gùng lòt nàng ală kơnòm bơsram in git lòt tàm gùng lơngăp lơngai”.

Mờ broă tus bal bơh ală kấp, gah lơh broă, bơta git wă broă lòt tàm gùng bơh ală cau mè bèp mờ kơnòm bơsram geh gơguh, bơta kòl, ờ niam tàm gùng lòt tềng mpồng hìu bơsram tàm càr Dăk Lăk tŭ lik rê geh rơhời gơmù, pơgồp bal tàm broă bơ̆t bơtàu broă lơh hìu bơsram tơlir, kloh, niam mờ lơngăp lơngai tàm gùng lòt.