Mho òr (09/01), Tỉñ ủy càr Dăk Lăk bơyai lơh Pơrjum tơn jơh ing 5 nam lơh jăt Nghị quyết sồ 35 nam 2018 bơh Ƀộ Cíñ trị khoă XII bè “Tơnguh sền gàr bơta tờm nùs nhơm bơh Đảng, tam dră mờ ală bơta tìs, tàm gơjrañ tàm bơta pa”, Tơn jơh broă Tuyên giáo nam 2023, lơh jăt kơnòl nam 2024. Tàm ală nam do, broă tam dră, sơndră mờ nùs nhơm ờ niam, broă lơh ờ niam “bơta gơlik geh ờ niam” mờ broă tam dră bơh ală mpồl gơjrañ mờ dră wơl tàm càr Dăk Lăk neh lơh geh ờ uă cồng nha pal kah ngan.

Tơl Đảng ƀộ neh lơh ngan tam gơl pa, tơnguh uă bơta niam mờ geh cồng nha broă lơh tàm gah nùs nhơm niam chài. Mơya, tàm càr Dăk Lăk kung gam gơlik geh ală bơta kal ke bè lơngăp lơngai, tàm hơ̆ uă ngan là ală bơta gơrềng tus ù tiah, jơi bơtiàn, jăt yàng. Ală cau dră wơl, mpồl cau ờ jăt gùng dà cíñ trị pơn jăt tai bơchồt, hoài jà, lơh geh mpồl tam dră mờ Đảng, Dà lơgar. Đơs tàm pơrjum, ồng Phạm Minh Tấn, Phó Ƀí thư Thường trựk Tỉñ ủy càr Dăk Lăk sồr, tàm tơngai tus, ală kấp ủy, gơnoar atbồ pơn jăt tai lơh pràn broă tam dră mờ ală nùs nhơm tìs, tàm gơjrañ, sền gàr bơta tờm nùs nhơm Đảng dê, sền do là kơnòl kwơ màng mờ geh lơh sùm bơh ală mpồl lơh broă cíñ trị mờ bơh tơl kwang bàng, đảng viên dê. Mờ pơn jăt tai git, kơlôi sơnơng, lùp sền mpồl bơtiàn nàng di tŭ pơlam, bơsong gờñ ală tiah di gơlan gơlik geh bơta ờ niam bơh tàm ală tiah.