Mò H’ Hương H’Wing, kòn cau Rơđê, kis tàm ƀòn M’Blốc B, xã krông Jing, kơnhoàl Mdrăk, càr Dăk Lăk neh uă nam tơn geh pin dờn pồ at gơnoar broă Ƀí thư Ci ƀộ. Bal mờ broă mblàng yal, lam sồr Làng bol lơh jăt niam ală gùng dà broă lơh bơh Đảng mờ Dà lơgar dê, mò H’ Hương gam là cau geh pơnrơ ngan tàm broă tam gơl phan tam, phan ròng, bơtàu tơnguh lơh sa hìu nhă. Mò yal, kơnờm mờ broă tus bal ală broă bơsram nàng tơnguh uă bơta pràn ai kwang bàng tàm tiah jơi bơtiàn dùl êt nă cau in, mò neh geh tus bal bơsram uă jơnau niam, mùl màl drơng tơn tàm broă lơh bơh să tờm mò dê. “Broă tơn jơh jơgloh tơmù rơƀah tàm ƀòn là broă kwơ màng ngan. Ƀòn sùm sền gròi tàm nghị quyết đơng lam, lam lơh bơh ƀộ dê là rềp mờ làng bol, bơto sồr làng bol bơtàu tơnguh lơh sa, git ngui bơta gơguh jăk khoa họk kỹ thuật tàm broă ròng kơnrồ, ròng sur. Git kàl lơh sa nàng sih tam di tŭ den rơhời ƀòn hơ̆ sồng geh tơn jơh rơƀah”.

Kơnờm mờ broă git wă nền nòn rài mis, bơhiàn ờs mờng bơh làng bol dê, bal mờ bồ tơngoh khin kơlôi khin lơh, khin dờp kơnòl, ală kwang bàng đảng viên jơi bơtiàn dùl êt nă cau neh lơh jăt niam kơnòl broă geh jào. Bơh tŭ hơ̆, pơgồp bal tàm broă gàr kơl jăp lơngăp lơngai ƀòn lơgar, lơh pràn broă tơmù rơƀah, bơtàu tơnguh lơh sa mpồl bơtiàn ƀòn lơgar in. Ồng Trần Hồng Tiến, Ƀí thư huyện ủy kơnhoàl Krông Păc đơs: “Gơwèt mờ kwang bàng bol añ rơwah ală kwang bàng kơnòm să jơi bơtiàn dùl êt nă cau tàm ƀòn geh bơta ngăc ngar, pràn kơl dang den rơwah nàng at gơnoar broă tờm ƀòn lơgar in, den gơtùi gŏ lài ngan bơh broă sền gròi, den bol añ gŏ ală kwang bàng do geh lơh gơs kơnòl broă geh jào mờ geh làng bol pin dờn”.

Tàm gùt càr Dăk Lăk tŭ do, khà kwang bàng, kông cứk, viên cứk là jơi bơtiàn dùl êt nă cau geh rơlao 13%. Tiến sĩ Nguyễn Thành Dũng, Kwang atbồ Hìu bơsram Cíñ trị càr Dăk Lăk pà git, ală kwang bàng jơi bơtiàn dùl êt nă cau ndrờm geh ai tơl bơta niam nàng bơsram tơnguh bơta ngăc ngar tàm broă lơh mờ cribơyai jơnau cíñ trị tàm sră pơ àr: “Tàm 10 nam do, khà cau bơsram rơlao 25 rơbô nă, tàm hơ̆ mìng is cau bơsram là cau jơi bơtiàn dùl êt nă cau geh rơlao 4 rơbô 500 nă. Do là cồng nha bơh broă bơto hìu bơsram dê neh pơgồp bal tàm broă bơto cau lơh broă geh bơta ngăc ngar uă dong kờl kấp ủy ală anih lơh broă bơ̆t bơtàu mpồl kwang bàng tàm càr dê geh bơta ngăc ngar, cồng nha uă rơlao”.

Jăt ồng Lê Nam Cao, Phó Kwang atbồ Mpồl rơndăp broă Tỉñ ủy càr Dăk Lăk đơs, ai broă bơ̆t bơtàu, bơtàu tơnguh mpồl kwang bàng, đảng viên, kông cứk, viên cứk jơi bơtiàn dùl êt nă cau là kơnòl kwơ màng bơh broă kwang bàng dê, càr neh lơh jăt Nghị quyết Pơrjum dờng dơ̆ XIII bơh Đảng mờ ală Nghị quyết bơh càr dê, lơh jăt ală broă lơh ndrờm bal pơgồp bal mờ broă ai geh ală broă dong kờl di pal. Bơta do neh ai geh bơta pràn kơl dang, lơh geh ală jơnau kờñ bè bơ̆t bơtàu mpồl kwang bàng, kông cứk, viên cứk cau jơi bơtiàn dùl êt nă cau. Ồng Lê Nam Cao pà git: “Bơ̆t bơtàu ală gơnoar broă lơh tàm mpồl cíñ trị, tàm hơ̆ geh ai lài ală gơnoar broă kwơ màng tờm ngan kờñ geh kwang bàng kòn cau, den pal rơwah kwang bàng jơi bơtiàn dùl êt nă cau. Càr kung neh lơh jăt broă rơwah gơwèt mờ oh kòn làng bol jơi bơtiàn dùl êt nă causơl”.

Jăt Nghị quyết bơh Đảng ƀộ càr Dăk Lăk dơ̆ 17 dê, tàm tơngai lơh broă bơh nam 2020 tus 2025, broă bơtàu tơnguh kwang bàng, đảng viên jơi bơtiàn dùl êt nă cau pơn jăt tai geh sền gròi. Càr lơh ngan tus nam 2025, khà kwang bàng, kông cứk, viên cứk jơi bơtiàn dùl êt nă cau tàm khà kwang bàng, kông cứk, viên cứk gùt càr geh 15% rơlao hờ đang.