Lơh jăt broă dong kờl tam dră mờ kòp jăt Nghị quyết sồ 16 nam 2021 bơh Cíñ phủ dê, tơnơ̆ mờ uă dơ̆ tơm priă, tus tŭ do càr Dăk Nông kung gam “dồs” mpồl kwang bàng lơh sơnơm kờp jơh khà priă rơlao 32 tơmàn đong. Jơnau yal bè broă do, ồng Huỳnh Thanh Huynh, Phó Kwang atbồ Sở Y tế càr Dăk Nông, pà git: “Gah lơh sơnơm neh pơgồp bal mờ gah priă jền dam mờ UɃÑZ càr nàng geh gùng dà bơsong, den tŭ do neh geh UɃÑZ càr bơtơl kờp dŭ khà kes priă nam 2023, tàm hơ̆ bơtơl priă tơm priă dong kờl broă lơh oh mi in tàm ală nam 2010, 2021 mờ 2022 là rơlao 32 tơmàn đong”.

Tàm pơrjum tam jào broă lơh sră ƀăo pa do, mò Tôn Thị Ngọc Hạnh, Phó Củ tịc UɃÑZ càr Dăk Nông yal, geh uă bơta lơh càr lơyài tàm broă tơm priă dong kờl ai ală kwang bàng lơh sơnơm tus bal tam dră mờ kòp Kovid-19 in. Dùl bơnah tài càr gam kal ke, kal ke ai geh priă, dùl bơnah tài pal lơh jăt nền nòn di mờ kơrnoăt tàm adăt boh lam dê. Tŭ do, ală kal ke do neh geh bơsong: “Bol añ tàm ală ngai pa do là pal đơng lam sùm, kal ke ngan mờ Sở Y tế, Sở Tài cíñ nàng bơsong jơh ală broă dong kờl ai gah lơh sơnơm in, bŭ lah bè hơ̆, pal di mờ tơngai lơh broă, ờ gơtùi lời gơtìp ală bơta tìs, den tàng gơtìp lơyài mùl màl. Tŭ do den broă do neh geh rơcang tơm, pa do bol añ kung neh jòi geh ală khà priă, pal kơ̆p bơh kes priă nam 2022 jơnkah priă tam pà, hơ̆ sồng bol añ pal tơmù uă broă lơh ndai nàng tơrgùm tàm broă bơsong broă dong kờl ai gah lơh sơnơm in. Pal đơs là càr geh sền gròi ngan, mơya tài kal ke bơh càr rơƀah dê, priă ờ geh den tàng kal ke ngan”.

Poh lài, hơ̆ là tàm ngai 03 nhai 6, Pơrjum dơ̆ 20 Mpồl đơng lam dà lơgar sơndră mờ kòp Kovid-19 neh pơrjum pờ tơlik tàm internet mờ ală càr, ƀòn dờng tàm gùt lơgar. Pơrjum do neh cri bơyai, sền wơl mờ wèt tus tơlik jơnau yal jơh kòp Kovid-19 tàm lơgar Việt Nam. Pa do Thủ tướng Cíñ phủ ồng Phạm Minh Chính đơng lam Ƀộ Y tế rơcang sră nggal tam gơl kòp Kovid-19 bơh kòp gơtờp gơwèt mpồl A tus mpồl B (hơ̆ là bơh mpồl ngòt rơngơ̆t ngan di gơlan lơh gơtờp uă, gơtờp tàm uă tiah, khà cau chơ̆t uă tus mờ mpồl kòp gơtờp ngòt rơngơ̆t di gơlan lơh gơtờp mhar, di gơlan lơh gơtìp chơ̆t) mờ wèt tus jơnau yal jơh kòp tàm lơgar Việt Nam.

Bal mờ jơnau yal jơh kòp Kovid-19, tềng bơdìh Pơrjum dơ̆ 5, Quốk hội khoă XV, ală kwang bàng kung neh dan lơh loh bơta tơm, tơm jơh gơwèt mờ ală phan bơna là măi mŏk, phan lơh broă gơwèt mờ phan bơna geh dong kờl, pleh mờ bơta prăp tàm anih prăp gàr, geh broă lơh nàng pleh mờ hoàc huơr gơwèt mờ bơta pràn kwơ màng neh geh hòi jà nàng tă geh. Kwang bàng Trần Văn Lâm, mpồl kwang bàng càr Bắc Giang, Kwang geh jơng tàm Ủy ƀan Tài cíñ Ngân sác bơh Quốk hội đơs là, tàm do geh bơta là ală phan bơna ờ hềt geh tơl bơta niam, sră nggal nàng ai tơmŭt tàm broă atbồ, ngui bè phan bơna dà lơgar dê: “Tàm tơngai kòp gơtờp, cau dong kờl măi mŏk cèng tus, ờ geh cau lơi kơlôi là tam gơl gơs phan bơna dà lơgar bè lơi? Pal geh sră nggal, khà priă bơta chài bè lơi. Bơta do tàm broă lơh priă jền kung neh geh ai, cih tàm pang sră nàng ai ngui, gam bè broă khà priă ờ pal geh cih, mìng tŭ lơi phan bơna do cèng sơbì, cèng tăc den hơ̆ sồng pal geh sền wơl. Tàm tŭ kơ̆p den pal cih là phan bơna bơdìh, tơnơ̆ mờ hơ̆ ngui geh cồng nha”.

Ală kwang bàng Quốk hội kung đơs là pal geh nàng lơgar Việt Nam tam gơl kòp Kovid-19 bơh kòp gơtờp mpồl A tus kòp mpồl B. Hơ̆ là bơh mpồl gơtìp ngòt rơngơ̆t tus mpồl kòp gơtờp ngòt rơngơ̆t mờ sền là kòp bè ờs ndai, bơsong mờ tơm priă kung pal lơh jăt bè ală kòp ndai. Kơlôi tơrgùm bal, kwang bàng Tạ Văn Hạ, mpồl kwang bàng càr Quảng Nam đơs là, kung gam pal bơto sồr mờ pơn jăt tai sền gròi nền nòn mờ bơta tam gơl să pa: “Bè đah khoa họk mpồl lơh sơnơm dunia neh geh yal bloh. Dơ̆ bàr tai là tàm mpồl màl lơgar Việt Nam broă lơh broă sa mpồl bơtiàn tŭ do neh bè ờs bloh. Bơta ngòt rơngơ̆t bơh tam gơl să pa do ờ pràn rơlao, mhar rơlao. Ai bơh tàm bơta do nàng he pal geh yal jơh kòp, mơya kung gam pal bơto sồr pal pơn jăt tai prăp gàr broă tam gơl să pa”.

Bơh 3 nam tam dră mờ kòp gơtờp pà gŏ ală broă lơh ngan, lơh ngan bơh ală mpồl cau tàm mpồl bơtiàn, tus bal tam dră mờ kòp, mơya jơh kòp gơtờp kung geh uă bơta gơtìp. Do là jơnau bơsram jal mhar nàng rơcang jơh bè phan bơna, sră nggal adăt boh lam, broă lơh bơto sồr geh kwơ nàng sơndră niam rơlao mờ kòp gơtờp ndai di gơlan lơh gơtờp.