Jat jơnau yal bơh Mpồl đơng lam rcang sơndră trồ tiah lơh aniai mờ jòi dong kờl rềs àr càr Dăk Nông dê, ală nhai bồ nam do, tàm ù tiah càr dê neh gơlik geh uă dơ̆ mìu càl pồt lơh gơ plồ rơkàng hìu mờ lơh aniai phan tam bơh làng bol dê, kờp dŭ hoàc huơr rlau 3 tơmàn 200 tơlak đong.

Ai tàm kàl mìu nam lài, tàm ù tiah càr dê neh gơlik geh 5 dơ̆ mìu dờng bal mờ càl rbŭt pồt pràn, lơh hoàc huơr tus hìu đam, phan bơna, phan tam mờ phan bơna bơt bơtàu, uă tiah tơrlah dùl ròt bal,... hoàc huơr pơgap 148 tơmàn đong. Kờp dŭ lài kàl mìu nam do, trồ tiah pơn jat tai gơlik geh kal ke ờ niam ngan, ờ gơtùi gĭt lài, Ủy ƀan Ñân zân càr Dăk Nông neh sồr ală mpồl lơh broă, ală tiah kờp sền, sền gĭt, bơtơl ală rơndap broă lơh rcang sơndră mờ mìu càl rơbŭ dờng, dà kŏ dà cò di pal mờ bơta geh ngan dê.