Jăt jơnau yal tàm Pơrjum Ƀan cấp hàñ Đảng ƀộ càr Gia Lai dơ̆ 12 (pờ ơnàng), yal khà tơnguh bơtàu lơh sa càr Gia Lai dê 6 nhai do geh 5,54% pơn drờm mờ nam 2022. Ală jơnau kờñ bè kờp jơh priă tă tàm kes priă dà lơgar, lơh sa mờ măi mŏk, geh 48,7% mờ 44,6%; khà mpồl lơh sa kă bro dan cih măt lơh broă wơl mờ khà rơndăp broă bơcri priă gơguh; broă lòt nhơl pơn jăt tai niam.

Mơya, uă tiah tàm càr Gia Lai kung gam kal ke tàm broă tă priă ngui ù lơh gơtìp ờ tơl priă ai ală rơndăp broă bơcri priă in; lơh kal ke tàm broă tam brê tài kơrnoăt tŭ do ờ hềt geh nùs nhơm pơlam sồr, lơyài tơlik broă rơndăp lơh ngui ù; tơngai lơh jăt ală broă lơh jăt jơnau kờñ dà lơgar lơyài, geh gŏ loh làng ngan bè Broă lơh jăt jơnau kờñ dà lơgar tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm.

Mìng is gah bơcri priă dà lơgar, jơh nhai 6 nam 2023, càr mìng rơ̆p bơcri geh mờr 600 tơmàn đong tàm khà kờp jơh priă 4 rơbô 178 tơmàn đong priă bơcri dà lơgar tàm nam dê, geh 13,85%. Do kung là gah mờ UɃÑZ càr Gia Lai mờ ală sở, gah lơh broă tàm càr do tơrgùm ai lài nàng bơsong tàm tơngai tus. UɃÑZ càr Gia Lai kung neh lơh geh 3 mpồl kwang bàng lơh broă nàng tus sền, pơlam, bơsong tơn ală broă gơlik geh. Ồng Đinh Hữu Hoà, Phó Kwang atbồ drơng broă Sở Kế hoạc mờ Đầu tư càr Gia Lai pà git: “Ală sở, gah lơh broă tus bal sền, sền nàng git sră cih lơh, lơh ngan tơmù tơngai sền nàng yal rơndăp broă geh niam. Dơ̆ pram là Sở Tài nguyên mờ Môi trường kung pal lơh mhar broă sền wơl, pơgồp bal mờ ală tiah nàng yal mờ anih lơh broă geh gơnoar sền bơsong nàng lơh bè lơi lơh mhar broă do”.

Kung tàm poh sơl, HĐÑZ càr Kon Tum kung bơyai lơh Pơrjum dơ̆ 5 nàng cri bơyai, sền wơl broă lơh sa mpồl bơtiàn 6 nhai bồ nam, ai geh gùng dà kơnòl broă lơh tờm 6 nhai lồi nam 2023 mờ ai geh ală tơngu me gơwèt gơnoar bơsong. Jăt mờ hơ̆, 6 nhai bồ nam, khà gơguh phan lơh geh tàm càr geh 6,8% pơn drờm mờ tŭ do nam lài, ơm dơ̆ 22 tàm 63 càr, ƀòn dờng gùt lơgar dê mờ uă ngan tàm tiah Tây Nguyên dê. Tàm hơ̆, tiah lơh sa mờ măi mŏk mờ bơ̆t bơtàu gơguh 10,88%; lơh sa suơn sre, brê bơnơm mờ phan tàm dà gơguh 5,65%; broă lơh drơng ala gơguh 5,31%.

Bŭ lah càr Kon Tum geh khà gơguh lơh sa uă ngan tàm Tây Nguyên, mơya kung gam ờ uă rơlao mờ jơnau kờñ gơguh 10% mờ càr geh ai tàm nam do. Bơdìh hơ̆ tai 6 nhai bồ nam tă tàm kes priă kờp dŭ geh mờr 1 rơbô 840 tơmàn đong, mìng geh mờr 41% khà broă rơndăp lơh geh ai; broă tơm ntrờn ù tiah lơh ală rơndăp broă, broă lơh tờm kung gam gơtìp kal ke...

Đơs dơ̆ sơn đờm pơrjum, ồng Dương Văn Trang, Ƀí thư Tỉñ ủy, Củ tịc HĐÑZ càr Kon Tum đơs là, pal geh broă lơh pràn rơlao, lơh niam wơl, tơmù mơ ală broă gam ờ pràn, tàm hơ̆ uă ngan là broă lơh jăt jơnau pal jăt ờ hềt nền nòn; pleh, ngòt bơh ờ uă kwang bàng, kông cứk tàm broă lơh jăt... nàng pơgồp bal tàm broă lơh geh cồng nha ală jơnau kờñ lơh sa mpồl bơtiàn nam 2023: “Ală kwang bàng tàm HĐÑZ càr tơrgùm mblàng nền nòn, sền wơl, song dơ pă bè cồng nha neh lơh geh, ală broă gam ờ pràn, kal ke tàm broă lơh jăt ală jơnau kờñ lơh sa mpồl bơtiàn mờ broă lơh gơs jơnau kờñ gơguh lơh sa bơh gùt nam 2023 dê, tàm hơ̆ uă ngan là broă hòi jà bơcri priă, tă priă bơcri dà lơgar mờ lơh jăt ală broă lơh jăt jơnau kờñ dà lơgar dê. Lơh loh jơnau bơh tài bè lơi gơbàn ờ gơtùi nàng geh mờ jơnau ờ geh rơcang tàm broă tơlik geh ală sră nggal mùl màl jơh ală gùng dà broă lơh bơh Dà lơgar mờ broă lơh jăt tàm ală kấp, ală gah lơh broă”.

Kung tàm pơrjum dơ̆ 5, HĐÑZ càr Kon Tum Khoă XII, tơngai lơh broă bơh nam 2021 tus 2026 neh sền wơl, ai tơlik kơrnoăt gơwèt mờ 32 tơngu me UɃÑZ càr tàm pơrjum, tàm hơ̆ geh ờ uă broă lơh kwơ màng bè: khà priă dong kờl nàng lơh jăt Broă ai lơh ƀòn ơm kis ală tiah gơtìp rềs àr bơh trồ tiah, tiah gơtìp kal ke, tiah nhàr dà lơgar, làng bol kis ntrờn khăt gơboh, tiah brê hòn is tàm càr; tam pà priă dong kờl tơnguh bơtàu hợp ták xã; lơh niam wơl broă rơndăp lơh ală jơnau kờñ dà lơgar nam 2022, 2023 mờ kờp dŭ gùng dà tam pà broă rơndăp bơcri priă dà lơgar nam 2024.