Càr Kon Tum mờ càr Attapư geh bal gùng nhàr dà lơgar jòng rơlao 75 kơi sồ mờ bă brê tàm tiah rềp bal gùng nhàr dà lơgar ơnàng di pơgăp 39 rơbô lồ. Brê tàm tiah do geh ù tiah kơh uă, koh gơl ngài mờ ƀòn ơm kis, tàm brê geh uă phan jơi kis, chi che geh kwơ den tàng sùm gơtìp mờ ală dơ̆ tìs bè broă atbồ, sền gàr brê.

Tơngai bơh nam 2024 tus 2025, Sở Nông nghiệp mờ Phát triển Nông thôn càr Kon Tum bal mờ Sở Nông Lâm càr Attapư, lơgar Lào neh rintg bal pơn jăt tai tơnguh broă pơgồp bal, tam gơl jơnau yal tơngit, jơnau git wă, broă lơh mờng chài nàng sền gròi, kơrian ală bơta tìs tàm gah brê bơnơm; lơh broă bal bè broă rơcang sơndră mờ ồs sa brê tàm jăt gah gùng nhàr dà lơgar gơwèt bàr càr dê. Geh git bơh nam 2016, Sở Nông nghiệp mờ Phát triển Nông thôn càr Kon Tum bal mờ Sở Nông Lâm càr Attapư neh mùl màl lơh broă bal bè sền gàr brê tàm tiah nhàr dà lơgar lòt gan bàr càr dê. Mìng is tơngai bơh nam 2019 tus 2023, mpồl sền gàr brê càr Kon Tum neh lơh geh mờr 600 dơ̆ lòt sền gròi, gŏ 35 dơ̆ tìs mờ Adăt brê bơnơm. Mpồl lơh broă geh gơnoar càr Attapư kung neh bơyai lơh 79 dơ̆ lòt sền, jòi kŭp, mờ kŭp geh rơlao 48 khối chi, bal mờ ờ uă bơta phan jơi kis tàm brê mờ uă bơta phan brê ndai.