Rơndăp broă lơh niam wơl, pờ ơnàng gùng koèl kơh Prenn Dà Làc là broă lơh gùng lòt kấp III tiah kơh bơnơm, jòng 7, 4 kơi sồ, ơnàng 4 gah rơndeh lòt, gùng ơnàng 15,5 thơ̆k mờ măt gùng ơnàng 14,5 thơ̆k, ơnàng rơlao bàr dơ̆ mờ gùng koèl kơh tŭ do.

Jăt gah geh lơh 4 tiah ơm rơndeh mờ 2 ƀlàng vọng kảñ. Rơndăp broă lơh geh khà priă bơcri 553 tơmàn đong bơh kes priă càr. Tơngai lơh rơndăp broă là 11 nhai, hơ̆ là geh lơh gơs lài mờ ngai 31 nhai 12 nam 2023. Đơs tàm dơ̆ mŭt lơh, ồng Trần Văn Hiệp, Củ tịc UɃÑZ càr Lâm Đồng pà git, broă bơcri priă lơh niam wơl gùng koèl kơh Prenn là geh kwơ, jal mhar mờ geh broă lơh jŏ jòng, pràn mhar bè broă tơnguh bơtàu gùng lòt càr Lâm Đồng dê; sồr mpồl lơh, sền gròi lơh gùng pal gàr niam bơta kơl jăp, gàr niam lơngăp lơngai tàm broă lơh mờ kloh niam tiah kis. Ală sở, gah lơh broă tờm bơh càr dong kờl, ai tơl bơta ƀuơn nàng lơh rơndăp broă di mờ tơngai geh ai.