Tơnơ̆ tŭ iăt kơno ală jơnau đơs, Thủ tướng Cíñ phủ ồng Phạm Minh Chính đơs nền, lơgar Việt Nam sùm sền dờng màng gĭt gơ̆p Tam klăc lơh broă bal mờ Lơh broă bal tơl làm đah Việt Nam mờ EU kung bè gĭt gơ̆p mờ ală lơgar tàm mpồl; sùm kờñ sơlơ tơnguh tai mờ lơh jrô ơnàng rlau tai bơta gĭt gơ̆p Tam klăc lơh broă bal jŏ jòng đah Asean mờ EU. Thủ tướng sồr ală cau bơcri priă, mpồl lơh sa kă bro EU dê pơn jăt tai lòt bal mờ lơgar Việt Nam tàm broă lam lơh 3 broă bơtàu tơnguh pràn, chồl tơnguh 3 bơta gơn kơnờm bơtàu tơnguh (bơcri priă, tăc phan mờ lơgar ndai, ngui sa); dong kờl lơgar Việt Nam geh gĭt mờ ală bơnah priă bơcri priă jền tơlir mờ măy mok pa, drơng jơnau kờñ bơtàu tơnguh kơ̆ kơl jăp tàm ală gah broă bè tam gơl sồ, tam gơl tơlir, lơh sa pơdar, bơtàu tơnguh phan bơna (tàm hơ̆ geh phan bơna bơ̆t bơtàu mờ phan bơna ờ bơ̆t bơtàu), tam gơl pa bơceh pa, bơto bơtê cau lơh broă geh broă lơh jak, lơh uă drà kă bro, phan bơna, ală anih lơh gơlik phan.