VOV4.K’ho- Mho ngai 04/07, Thủ tướng Cíñ phủ ồng Phạm Minh Chính bal mờ ală kwang bàng tàm Cíñ phủ, ală tiah neh bơyai bè lam lơh jăt ală rơndăp broă lơh gùng lòt kwơmàng dà lơgar. Đơs tàm dơ̆ pơrjum, Thủ tướng Cíñ phủ ồng Phạm Minh Chính đơs là, broă lam lơh ală rơndăp broă lơh gùng lòt kwơmàng dà lơgar dê là lơh jăt kơnòl broă bơtàu tơnguh mhar broă lơh mờ Kơrnoăt Pơrjum dờng dơ̆ XIII bơh Đảng dê neh đơs loh. Thủ tướng sồr ală ƀộ, ngàñ, ală tiah pơn jăt tai kờp sền, lơh niam broă lơh rơcăng bơcri priă.

Lơh pràn broă ai ù lơh gùng, tàm hơ̆ gơnoar broă kwơmàng bơh gơnoar ătbồ tàm tiah hơ̆ dê. Ai priă jền tơl nàng lơh ală rơndăp broă lơh mờ ai priă jền gơtùi ală priă bơcri lơh. Ƀộ Xây zựng, Ƀộ Tài nguyên mờ Môi trường pơn jăt tai kờp sền, dilah gam gơkòl den tă bơsong tơn nàng geh ală anih tơnhàu phan kwơ tàm ù, tơl phan ngui bơ̆t bơtàu ai ală rơndăp broă lơh in. Thủ tướng sồr mhar pồ tơl Mpồl đơng lam Dà lơgar bè bơtàu tơnguh phan bơna; ală tiah lơh Mpồl lơh broă, tàm hơ̆ Củ tịc Ủy ƀan Ñân zân là cau ătbồ mpồl lơh broă nàng sồr lơh mờ bơsong ală bơta gơkòl gơlik geh tàm ală tŭ lơh ală rơndăp broă lơh...

Cau mblàng Lơ Mu K’Yến