Sùm tàm 9 nam do, pah nhai, bi Nguyễn Văn Tiến, kwang bàng Cơldŭ lơh broă Đảng ủy xã Buôn Tría, kơnhoàl Lăk, càr Dăk Lăk ndrờm tă 10 rbô đông nàng tă pơgồp tàm “Kes priă Tềm pềr lơh jat jơnau bơto sồr Wa Hồ” bơh anih lơh broă he dê. Bi yal, khà priă tă pơgồp ờ uă, broă lam lơh ƀuơn mơya neh cèng wơl ală cồng nha ngan ngồn: “Añ gŏ srơh Kes priă Tềm pềr lơh jat jơnau bơto sồr Wa Hồ do cèng bơta niam chài dong kờl kòn bơnus, là broă lơh niam ngan den tàng geh jơh gùt đảng viên tàm jơh gùt Đảng ƀộ kung bè đoàn viên tàm ală thôn, ƀòn jơh nùs ngan lơh jat. Bè đảng viên kơnòm să bol hi pah nhai tă pơgồp 10 rbô đông”.

Kes priă Tềm pềr lơh jat jơnau bơto sồr Wa Hồ là cồng nha srơh tàm pơrlòng “Kes priă Tềm pềr lơh jat jơnau bơto sồr Wa Hồ” geh Mpồl lơh kơnòl broă sùm Huyện ủy kơnhoàl Lăk gàr sùm tàm uă nam do nàng dong kờl ală cau geh rài kis kal ke. Jat hơ̆, tơl nă kwang bàng, đảng viên, đoàn viên, công chức, viên chức, cau lơh broă gùt kơnhoàl tàm 3 ngai den tềm pềr êt ngan rlau jơh là 1 rbô đông; đoàn viên, cau tàm mpồl tàm kâp hơ đơm tàm 10 ngai den tềm pềr êt ngan rlau jơh 1 rbô đông. Bơnah kes priă do bơh Ƀan Tuyên giáo Huyện ủy kơnhoàl Lăk atbồ. Mò Đào Thị Thanh An, Phó Ƀí thư Duh broă sùm Huyện ủy kơnhoàl Lăk pà git, mờ broă lơh do, tàm 9 nam do, jơh gùt kơnhoàl neh tă pơgồp geh mờr 3 tơmàn đông, dong kờl git nđờ rhiang nă cau kal ke là hìu bơnhă geh sră dong kờl bơh dà lơgar, đảng viên, cau kis dùl nă să, cau kòp kơn jơ̆: “Ai broă lơh do lam lơh den ngai sơlơ gơ rề uă mờ cèng wơl bơta kuơ ngan ngồn nàng ai tơnggŏ bơta niam chài dong kờl kòn bơnus, pơgồp bơnah lơh gơ rề uă bơta kờñ gơboh tus mpồl bơtiàn kung bè ngai sơlơ tam pà bal ală kal ke, bòl glar tus mờ ală cau geh rài kis kal ke, cau kis dùl nă să, cau kòp kơn jơ̆ nàng khi geh tai bơta pràn brồ guh, geh tai bơta chờ hờp tàm rài kis”.

Bal mờ kơnhoàl Lăk, broă lơh Kes priă Tềm pềr lơh jat jơnau bơto sồr Wa Hồ neh geh lam lơh uă, gàr sùm cồng nha tàm uă tiah, bè: Cư mgar, Cư Kuiñ, Krông Ana, Krông Bông, Krông Buk, Krông Păk, M’Drăk bơh càr Dăk Lăk dê. Tàm 2 nam do, broă lơh do neh tềm pềr geh rlau 10 tơmàn đông, bơh hơ̆ dong kờl lơh 89 hìu ơm, 2 cơldŭ ơm ai cau pơgru, jàu pà git nđờ rhiang bơnah phan ai ală hìu bơnhă geh sră dong kờl bơh dà lơgar, cau geh màng mờ kac màng in.

Bàr, pe tiah neh geh broă lam lơh tềm pềr dùl bă bơceh pa, hòi jà geh bơta tus bal bơh gal ngan kwang bàng, đảng viên mờ làng bol dê. Pơn rơ bè ală broă lơh “Lam lơh ngan ngồn tềm pềr dong kờl đảng viên geh rài kis kal ke” bơh Thàñ ủy ƀòn dờng Buôn Ma Thuột dê; “Lơh hìu jă brê hìu bơsram” bơh Huyện ủy kơnhoàl Cư Mgar dê; “Sră tềm pềr mut mơ̆ rơmit” bơh Thị ủy Thị xã Buôn Hồ dê… Ồng Phạm Minh Tấn, Phó Ƀí thư duh broă sùm Tỉñ ủy càr Dăk Lăk đơs: Do là ală broă lơh ngan ngồn mờ geh cồng nha tàm broă “lơh jat jơnau bơto wa Hồ, lam lơh ngan ngồn tềm pềr” bơh kâp hơ đơm: “Bơsram mờ lơh jat bồ tơngoh, niam chài rài kis Hồ Chí Minh là dùl broă lơh sùm. Mờ Tỉñ ủy càr neh đơng lam loh làng ngan bơh ci ƀộ kâp hơ đơm, bơh tơl nă đảng viên pal ai broă bơsram, lơh jat bồ tơngoh, nùs nhơm, niam chài rài kis wa Hồ dê gơ gơs broă lơh sùm mờ tơmut tàm ală dơ̆ pơrjum pah ngai, pah nhai nàng tơl nă cau pơn jat tai git loh mờ lơh jat nàng lơh bè lơi gơ gơs dùl srơh lơh is mờ cèng bơta ngan ngồn, kờp bal mờ ală broă dềt rơhền halà ală broă dờng, tàm broă dong kờl gơp tơn jơh jơgloh, tơrmù rƀah, bơt bơtàu ƀòn lơgar pa, lơh gơs ală kơnòl broă geh jàu”.

Ờ mìng là srơh, Kes priă Tềm pềr lơh jat jơnau bơto sồr Wa Hồ neh gơ gơs dùl broă lơh sùm geh tơl nă kwang bàng, đảng viên mờ làng bol tàm càr Dăk Lăk lơh jat dùl bă git lơh is. Broă lơh ƀuơn mơya bơta kuơ cèng wơl mờ bơta gơ rề dờng ngan, cèng tus bơta chờ hờp ai uă cau rƀah in bơh ală hìu dờng, niam halà bơta dong kờl di tŭ tàm tŭ kal ke, rềs àr. Broă lơh neh đòm jat bơhiàn “Tàm kờñ gơboh bal kòn bơnus” niam bơnĕ bơh jơi bơtiàn dê, là broă ngan ngồn nàng bơsram mờ lơh jat krơh niam Hồ Chí Minh.