Tàm dơ̆ cri bơyai, ală cau jăk chài, cau lơh broă kơlôi sơnơng tơrgùm lơh loh mờ pơn jăt tai đơs nền tus mờ broă lơh dờng màng bơh Đại tướng Đoàn Khuê dê, Cau Kộng sản jăk chài, cau lam lài bè nùs nhơm niam kăc màng, jơh rài kis lơh broă, phi să ai broă kăc màng Đảng dê, Jơi bơtiàn mờ Ling klàng in.

Thượng tướng ồng Lê Huy Vịnh, Thứ trưởng Ƀộ Quốk phòng đơs tờm: Tàm 60 nam lơh broă kăc màng, Đại tướng Đoàn Khuê neh sơrlèt mờ uă gơnoar broă, tàm uă gah broă lơh krơi is. Bŭ lah tàm gơnoar broă lơi, bơta lơh broă lơi, Đại tướng Đoàn Khuê kung sùm gàr nùs nhơm bơh cau ling kăc màng, jơh nùs drơng broă Dà lơgar, drơng broă Làng bol, ngăc ngar, jăk chài, bơceh pa tàm broă đơng lam, lam lơh, lơh gơs jăk chài ală kơnòl broă mờ Đảng, Dà lơgar bal mờ Làng bol jào.