Broă lơh do bơh Họk viên cau ùr Việt Nam mờ Hìu bơsram Đại họk Chonnam lơgar Hàn Quốc dê pơgồp bal bơyai lơh, mờ bơta tus bal bơh ală cau jak chài ală lơgar Việt Nam, Thái Lan mờ Lo.

Jat jơnau yal bơh Mpồl ntrờn làng bol ơm kis Dunia nam 2022, kờp dŭ lài jơh gùt dunia geh 281 tơlak nă cau ntrờn ơm kis nam 2020, ndrờm mờ 3,6% khà kờp làng bol gùt plai ù. Khà cau ntrờn ơm kis dunia neh gơguh sùm tàm 50 nam do. Mơya, bơdìh hơ̆ gam geh uă ngan broă geh gơrềng tus ntrờn làng bol ơm kis, bè: sền gàr niam rài kis mpồl bơtiàn, lơngăp lơngai tàm ntrờn làng bol ơm kis mờ lơngăp lơngai lơh broă ai cau ntrờn ơm kis in. Do là ală broă kờñ pal geh sền gròi kơlôi sơnơng uă rlau tai. Den tàng bè hơ̆, tàm dơ̆ cribơyai, ală cau jak chài, ală kwang bàng bơh lơgar Việt Nam, Hàn Quốc, Thái Lan mờ Lo tơrgùm cribơyai tàm 4 tơngume tờm, tàm hơ̆ geh: ntrờn làng bol ơm kis mờ ală broă bè ùr klau; trờn làng bol ơm kis mờ sền gròi pràn kơl dang să jan; Ntrờn làng bol ơm kis mờ sền gàr dong kờl mpồl bơtiàn; broă ndai geh gơrềng tus ntrờn làng bol ơm kis.