Đơs tàm dơ̆ mut pơrjum, Đại sứ Việt Nam tàm lơgar Tây ồng Đinh Toàn Thắng đơs niam bơta pơn đơl pràn bơh ală cau dùl nă să mờ mpồl dê bal mờ gơp tă pơgồp nàng bơyai lơh cribơyai. Đại sứ đơs là, do là broă geh gơtha dờng màng ngan gơ wèt mờ cau Việt Nam tàm lơgar ndai, kuơmàng là cau Việt Nam tàm câu Âu, ai tơnggŏ nùs nhơm mờ bơta đềt mềr bơh cau Việt Nam tàm lơgar ndai dê gơ wèt mờ ƀòn tờm, mờ dà lơgar mờ jơh bal mờ ală tơngume dờng bơh dà lơgar dê, jơi bơtiàn dê.

Ală jơnau cribơyai neh đơs tus uă bơta wèt sền bè dà lềng đah mat tơngai lik mờ bơta gơnoar tờm bồt dà lềng Việt Nam, sền sơ wì tàm ală gah kah yau, niam chài, cíñ trị mờ adat boh lam. Dà lềng mờ gơnoar tờm bồt dà lềng sùm là bơta geh sền gròi ờ mìng gơ wèt mờ Việt Nam mờ gam jơh bal mờ ală lơgar geh gùng nhàr dà lơgar tàm dà lềng. Mờ 14 jơnau cribơyai geh đơs, dơ̆ cribơyai neh pơgồp bơnah cèng tus làng bol in ală bơta sền sơ wì mờ ală jơnau bơceh lơh nàng bal mờ gơp bơt bơtàu mờ bơtàu tơnguh jat bơnàng jă ki ngàm gơnoar tờm mờ ù tiah bơh gơp dê.