Tiah câu Á mờ câu Âu là drà kă bro ờs mờng lơgar Việt Nam dê mờ tŭ do geh sền là drà tăc phan mờ lơgar ndai geh bơta pràn. Do là tiah geh 28 lơgar, jòng bơh đah măt tơngai lik câu Âu tus tiah tàm gùl câu Á, khà kờp làng bol rơlao 400 tơlăk nă mờ GDP geh mờr 4 rơbô 500 tơmàn dolar Mỹ.

9 nhai nam 2023, kă bro phan đah lơgar Việt Nam mờ ală lơgar tàm tiah câu Á-câu Âu geh 9 tơmàn dolar Mỹ. Tàm hơ̆, tăc phan bơh lơgar Việt Nam dê tus tàm tiah do rơlao 6 tơmàn dolar Mỹ; blơi geh mờr 3 tơmàn dolar Mỹ. Ƀộ Kông thương mờ gơnoar broă là anih lơh broă đơng lam ală broă lơh sa kă bro bal đah bàr lơgar mờ uă lơgar tàm Tiah câu Á-câu Âu geh pơn jăt tai pơgồp bal mờ ală anih lơh broă geh gơnoar, lơh broă bal mờ mpồl bơtiàn mpồl lơh sa kă bro nàng git mờ ngui bơta niam lơh broă bal pa, bơsong kal ke, gơkòl nàng lơh pràn ală broă kă bro mờ bơcri priă.