Tàm dơ̆ pơrjum, Mpồl duh broă Sền gàr dà lơgar mờ Lơngăp lơngai neh cribơyai mờ tă pơgồp jơnau đơs bè ală cồng nha lơh geh tàm ală gah broă, ngan là sền gàr dà lơgar, lơngăp lơngai, lơh broă mờ lơgar ndai tàm tơngai pa do; mblàng sền, đal gĭt nền broă gơlik geh tàm dunia, tàm kơnhoàl ù tiah do mờ ală bơta gơrềng, bơta tam gơl gơ wèt mờ lơgar Việt Nam; dan tơngume broă lơh, kơnòl broă nam 2024.

Bè tơngume ală dơ̆ pơrjum Mpồl duh broă dê nam 2024, Mpồl duh broă ring bal cribơyai mờ ai jơnau đơs bè ală broă kwơmàng, gơcèng bơta jŏ jòng gơrềng tus sền gàr dà lơgar, lơngăp lơngai, lơh broă mờ lơgar ndai, jăt tàm bơta hơ̆ dan, mờ tă pơgồp jơnau đơs mờ Ƀộ Cíñ trị, Quôk hội, Cíñ phủ. Ala măt Mpồl duh broă, Củ tịc lơgar Võ Văn Thưởng sồr, tàm tơngai tus, ală mpồl cau, anih lơh broă geh gơnoar pơn jăt tai lơh jăt, jăt sền, rơcăng lài gĭt nền, kơlôi sơnơng, mblàng sền, sền swì, yal lài dipal broă gơlik geh tàm dunia, tàm tiah do mờ tàm lơgar, bơh hơ̆ di tŭ dan mờ Đảng mờ Dà lơgar ală gùng dà, broă lơh bơsong, sền gròi sền gàr bơta tờm bồ tơngoh Đảng dê, tam dră wơl mờ ală mpồl cau gơjrañ kwềng; pơn jăt tai đòm jăt bơhiàn ờs mờng bơh yau, bơta pràn tam klăc dờng jơh gùt jơi bơtiàn tàm broă lơh bơ̆t bơtàu mờ sền gàr Dà lơgar.