Củ tịc lơgar ing mò Võ Thị Ánh Xuân chờ hờp mờ ồng Fernando Apparício da Silva neh lơh sir kơnòl broă tàm gơnoar broă Đại sứ lơgar Brazil tàm lơgar Việt Nam; jờng rơ ngan bơta tă pơgồp bơh ồng Đại sứ dê tàm broă bơ̆t bơtàu mờ bơtàu tơnguh bơta gĭt gơ̆p Tam klăc lơh broă bal tơl ală bơta đah Việt Nam mờ Brazil ngai sơlơ gơlòt mŭt ngan ngồn tàm uă broă mờ lơh geh cồng nha. Kwơmàng, tàm pơgơl kă bro đah 2 lơgar gàr sùm bơta gơguh bơh pah nam, Brazil pơn jăt tai là lơgar tam klăc lơh broă bal kă bro dờng ngan rlau jơh lơgar Việt Nam dê tàm tiah Mỹ Latiñ, bal mờ priă lơh geh bơh kă bro tàm nam 2022 pa do uă ngan rlau jơh bơh lài tus tŭ do là 6 tơmàn 780 tơlak dolar Mỹ. Bal mờ hơ̆, lơh broă bal tàm ală gah broă lơh, bè lơh broă sa sươn sre, nhơl chờ, niam chài, tìp măt lơh kwèng bal đah làng bol pơn jăt tai geh lơh mờ bơtàu tơnguh.