Ala mat Kwang đơng lam bồ Đảng, Dà lơgar, Củ tịc lơgar ing mò Võ Thị Ánh Xuân pơ yoa jơnau gờm chờ niam bơnĕ ngan rlau jơh, jơnau ưn ngài uă ngan tus mờ mpồl cau lơh sơnơm, ală kwang bàn g, cau lơh sơnơm gah lơh sơnơm dà lagar dê, mơkung đơs nền, Đảng, Dà lơgar sùm sền gròi, đơng lam, sồr lơh, bơcri priă ai gah lơh sơnơm in.

Nàng lơh geh jơnau kờñ bơtàu tơnguh dà lơgar pas gơs, chờ hờp, ngan là jơnau kờñ gơ gơs dà lơgar bơtàu tơnguh tàm nam 2045, Củ tịc lơgar ing mò Võ Thị Ánh Xuân đơs là, bơta jak chài mpồl cau lơh broă dê là kwơ màng ngan, tàm hơ̆ geh bơta chài mpồl cau lơh broă gah lơh sơnơm dê. Den tàng, gah lơh sơnơm pal pơn jat tai bơto bơtê, bơtàu tơnguh mpồl cau lơh broă, ngan là tàm tơngai dunia mờ dà lơgar he pal kong mờ ală bơta kòp, tàm hơ̆ geh ală kòp pa ờ hềt tŭ lơi geh bơh lài, pơhìn tus màng kis, pràn kơl dang bơh kòn bơnus dê; di pal mờ jơnau sồr sền gròi pràn kơl dang să jan làng bol in tàm tơngai pa.