Dờp jơnau jà bơh Củ tịc lơgar ồng Lương Cường, Kwang atbồ lơgar Kộng hoà Bulgaria ồng Rumen Radev mờ pơ ùr neh tus càr lơgar Hà Nội, sơnđờm dơ̆ lòt còp ngan ngồn lơgar Việt Nam bơh ngai 24 tus ngai 28 nhai 11 nam 2024. Drim ngai 25/11, tàm Hìu lơh broă Củ tịc, Củ tịc lơgar ồng Lương Cường mờ pơ ùr neh đơng lam dơ̆ wă rò ngan ngồn Kwang atbồ lơgar Bulgaria ồng Rumen Radev mờ pơ ùr lòt còp ngan ngồn lơgar Việt Nam. Tơnơ̆ dơ̆ wă rò, Củ tịc lơgar ồng Lương Cường mờ Kwang atbồ lơgar Bulgaria ồng Rumen Radev lam bồ mpồl kwang bàng kấp dờng 2 lơgar lơh dơ̆ tìp mat cribơyai, sền wơl cồng nha lơh broă bal đah 2 lơgar tàm tơngai pa do mờ geh đơs ală gùng dà broă lơh lơh broă bal tàm tơngai tus.

Bàr nă kwang đơng lam bồ neh cribơyai jrô ơnàng làm uă bè ală pơlam gùng dờng, geh broă bơsong ngan ngồn nàng sơlơ tơnguh tai lơh broă bal mờ tơnguh gơnoar bơta gĭt gơ̆p tàm tơngai tus. Ngan là sơlơ tơnguh tai tìp mat kwang bàng kấp dờng, bơt bơtàu bơta tờm lơh broă bal bè kă bro phan, bơcri priă, pơn jờng ală Ƀộ, gah broă ală tiah mờ mpồl lơh sa kă bro 2 gah lam lơh geh cồng nha Jơnau hơ nền Kă bro phan khat gơboh Việt Nam mờ EU; lơh pràn lơh broă bal tàm ală gah broă lơh sa suơn sre, niam chài, tàp pràn să jan, măi mok yal tơngĭt jơnau, lơh gơlik phan tàm ù tiah, tiah ơm kis. Bàr lơgar đơs nền rơ̆p pơgồp bal niam, tam pà bal mờng chài mờ dong kờl bal mờ gơ̆p tàm ală dơ̆ cribơyai uă lơgar, pơgồp bơnah sơm bat tê bal bơsong ală bơta lòng gùt plai ù dê.