VOV4.K’ho- Di dơ̆ tơngkah kir sơnrai 40 nam Ngai tơlik mờ rcang lài Pơrjum dờng dơ̆ 9 tơngai lơh broă bơh nam 2022- 2027 bơh Tổng hội Bơt bơtàu Việt Nam, mho ngai 05/07, tàm hìu lơh broă Củ tịc, Củ tịc lơgar ồng Nguyễn Xuân Phúc tìp mat mpồl kwang bàng ala mat ai rlau 7 rơbô nă cau tàm mpồl, mpồl cau, cau dùl nă să is bơh Tổng hội Bơt bơtàu Việt Nam dê.

Củ tịc lơgar ồng Nguyễn Xuân Phúc tìp mat mpồl kwang bàng Tổng hội Bơt bơtàu Việt Nam

Đơs tàm dơ̆ tìp mat, ala mat Kwang đơng lam bồ Đảng, Dà lơgar, Củ tịc lơgar jờng rơ ală bơta lơh ngan, tă pơgồp bơh Tổng hội Bơt bơtàu Việt Nam dê tàm 40 nam do gơwèt mờ broă lơh bơt bơtàu mờ bơtàu tơnguh dà lơgar. Củ tịc lơgar sồr Tổng hội đòm jat niam bơhiàn 40 nam, hòi jà mpồl ală cau khoa họk mờ cau jak chài tàm lơgar mờ gơ hòi gơ jà geh uă ngan mpồl cau geh bồ tơngoh jak cau Việt Nam tàm lơgar ndai nàng tơnguh uă bơta niam lơh broă. Mơkung tơnguh uă bơta niam bơto pơlam, jat sền gĭt nền, jơnau đơs tă pơgồp bơh mpồl bơtiàn dê tàm gah bơt bơtàu; cribơyai mờ Đảng mờ Dà lơgar ală broă bè broă lơh jŏ jòng bơtàu tơnguh geh gơrềng bè hìu ơm, tiah drà, lơh sa mờ măi mok, ală phan bơna lơh sa- mpồl bơtiàn, ală broă  bè bơ̆t mòn hìu đam, rơndap ù tiah gàr niam cèng wă bơta tềl lời wơl niam chài rơgơi Việt Nam dê.

Cau mblàng K’Hạnh