Tơnơ̆ mờ tŭ wă rò, Củ tịc lơgar ồng Võ Văn Thưởng mờ Kwang atbồ lơgar Hàn Quốk yal ală kwang ala măt kấp dờng bàr lơgar tus bal dơ̆ wă rò.

Pơn jăt mờ hơ̆, bàr kwang đơng lam lam bồ bàr mpồl kwang bàng kấp dờng đah bàr lơgar tus cri bơyai bal. Sền kwơ bơta git gơ̆p mờ lơgar Việt Nam, lòt bal mờ Kwang atbồ lơgar Hàn Quốk còp lơgar Việt Nam dơ̆ do geh gal ngan kwang bàng ala măt kấp dờng, tàm hơ̆ geh: Phó Thủ tướng drơng kơnòl broă lơh sa mờ kung là Ƀộ trưởng Ciến lượk mờ Priă jền ồng Choo Kyung Ho mờ ờ uă Ƀộ trưởng, kwang đơng lam ală ƀộ, gah lơh broă dà lơgar. Bơdìh hơ̆ tai gam geh rơlao 200 mpồl lơh sa kă bro lơgar Hàn Quốk. Do là khà mpồl lơh sa kă bro gal ngan tàm ală dơ̆ tus còp lơgar bơdìh pa do ngan bơh Kwang atbồ lơgar Hàn Quốk dê, pà gŏ bơta kwơ màng bè lơh broă bal bè lơh sa, bơcri priă, kă bro đah bàr lơgar. Hơ jơnau lùp bơh cau lơh ƀăo dê lài mờ dơ̆ tus còp lơgar Việt Nam, Kwang atbồ lơgar Hàn Quốk ồng Yoon Suk Yeol kơ̆p kờñ lơh pràn lơh broă bal mờ lơgar Việt Nam tàm uă gah broă.