Drim ngai 05/07, Củ tịc lơgar ồng Võ Văn Thưởng lơh broă mờ Ƀộ Kwang àng, Anih Cah rña làng bol dờng ngan rlau jơh, Viện Kiểm sát làng bol dờng ngan rlau jơh, Cơldŭ lơh broă Củ tịc lơgar, Mpồl lơh broă cíñ trị tàm dơlam is dà lơgar dê mờ Ủy ƀan Sền gàr adat boh lam bơh Quôk hội dê nàng sền swì broă lơh broă bơsong sră nggal kơrnoăt lơh glài gơ sơ̆t mờ lơh jăt kơrnoăt lơh glài gơ sơ̆t tàm tơngai lài.

Tơngai lài, ală anih lơh broă geh gơrềng tàm Dà lơgar mờ ƀòn lơgar neh pơgồp bal niam, sền swì, bơsong sră nggal kơrnoăt lơh glài gơ sơ̆t, ătbồ krơ̆ jàm mờ lơh jăt kơrnoăt lơh glài gơ sơ̆t geh lơh jăt jơnau sồr bơh kơrnoăt boh lam dê. Bulah bè hơ̆, broă lơh do kung gam sơl ală bơta ờ hềt dipal, ờ hềt niam, ờ hềt lơh geh jơnau sồr ngan ngồn gơ ai tơlik. Củ tịc lơgar ồng Võ Văn Thưởng sồr, tơngai tus, ală anih lơh broă pal pơn jăt tai lơh jăt wil tơl, lơh jăt kràñ kơnòl broă, gơnăp gơnoar bơh he dê jăt di jơnau cih bơh kơrnoăt boh lam dê; tam pà mờ gĭt loh kơnòl broă bơh tơl anih lơh broă dê; sơlơ pơgồp bal; tus sền swì, kờp sền sùm, sùm sùm, lơh jăt geh cồng nha, gàr niam cồng nha kơrnoăt boh lam geh tơnguh uă. Củ tịc lơgar sồr, ală anih lơh broă pal kơlôi sơnơng, dan pơlam gùng tam gơl, bơtơl ală jơnau cih kơrnoăt boh lam gam geh ngui tŭ do dê bè broă lơh glài gơ sơ̆t mờ lơh jăt kơrnoăt lơh glài gơ sơ̆t lơh geh jơnau sồr ngan ngồn tàm rài kis, yal mờ anih lơh broă geh gơnăp gơnoar in sền swì, lơh nền.