Tơnơ̆ mờ tŭ iăt ală jơnau đơs tàm dơ̆ lơh broă, Củ tịc lơgar đơs niam càr neh lơh gơs 22 nơm tơnao dơng dà geh bơta dờng 520 tơlăk khối nàng tơl ai dà ngui sa, lơh sa; gơs anih tờm ròng ka ti sơntìl uă ngan gùt lơgar dê. Khà cau năc lòt nhơl tus tàm càr ngai sơlơ gơguh. Gah niam chài mpồl bơtiàn geh sền gròi.

Ai gŏ ờ uă bơta kal ke tàm broă tơnguh bơtàu càr Ninh Thuận dê, Củ tịc lơgar ồng Võ Văn Thưởng sồr, Đảng ƀộ, gơnoar atbồ bal mờ làng bol tàm càr pal pơn jăt tai lơh jăt nghị quyết Pơrjum dờng Đảng ală kấp, mờ bồ tơngoh kơlôi sơnơng niam pràn, geh sền gròi ơnàng, ai geh bơta pràn pa nàng lơh pràn broă tơnguh bơtàu lơh sa mpồl bơtiàn mhar mờ kơl jăp. Củ tịc lơgar kung sồr càr pơn jăt tai lơh geh nùs nhơm kơ̆p kờñ brồ guh, nùs nhơm tam klăc bal, lơh is, pràn is, bơta pràn bơh tàm dơlam dê, bơhiàn niam rài lài do, bơta niam chài, kòn bơnus Ninh Thuận; Bơ̆t bơtàu bơta niam chài tơnguh bơtàu tơl ală bơta kòn bơnus Ninh Thuận dê.

Mang ngai 15 nhai 06, Củ tịc lơgar neh tus dờp Sră cih măt bơh UNESCO gơwèt mờ bơta niam chài lơh ù buh bơh cau Prum tàm khà măt ală phan lời wơl niam chài ờ di phan bơna pal geh prăp gàr jal mhar mờ sơn đờm Lơh chờ Nho-Vang Ninh Thuận nam 2023.