Tus tŭ do, gùt càr Vĩnh Long geh 16 rbô nă cau ling chơt màng, 4 rbô 500 nă cau ling sồt să mờ cau ling kòp tê jê să, mờr 3 rbô nă mè Việt Nam khin cha jak chài. Củ tịc lơgar kơp kờñ cau geh màng mờ dà lơgar càr Vĩnh Long pơn jat tai ngui niam bơhiàn pơn iờ să bơh ƀòn tờm ù tiah cau jak chài dê, pơn jat tai tă pơgồp dà kơl hề, bơta pràn tàm broă lơh bơtàu tơnguh ƀòn lơgar Vĩnh Long khin cha jak chài.

Đơs tàm dơ̆ tìp mat, Củ tịc lơgar jờng rơ uă cau geh màng mờ dà lơgar mờ hìu bơnhă neh sơrlèt gan bơta jê sồt kòp jê, kal ke, gàr niam nùs nhơm brồ guh tàm rài kis, bơt bơtàu mờng kwèng rài kis niam chài tàm ƀòn lơgar. Ală cau ala mat bulah neh dờng sơnam, să jan ờ sô mơya kung gam sùm kơlôi sơnơng là pal pơn jat tai tă pơgồp ai ƀòn lơgar, dà lơgar in, bơto bơtê bồ tơngoh do ai cau kơnòm să in. Củ tịc lơgar kơp kờñ, nùs nhơm do pơn jat tai geh sền gàr, ngui niam tàm jơh gùt cau geh màng mờ dà lơgar tàm gùt lơgar, tă pơgồp bơt bơtàu ƀòn tờm, dà lơgar ngai sơlơ pas sơm, niam bơnĕ.