Tàm dơ̆ tìp mat cribơyai broă, 2 gah neh bal mờ gơp cribơyai ală broă lơh ngan ngồn nàng lơh jat jơnau ring bal bơh kwang đơng lam bồ dờng ngan rlau jơh 2 Đảng, 2 dà lơgar dê, pơn jat tai sơlơ chồl pràn mờ lơh niam rlau tai bơta git gơp lơh bơyô bal, lơh broă bal tàm ală gah. Củ tịc lơgar sồr, tơngai tus, 2 gah pơn jat tai pơgồp bal jơh nùs, rơcang niam ai ală broă lơh cribơyai broă mpồl kwang bàng kâp dờng; sơlơ tơnguh lơh broă bal đah ală ƀộ, mpồl, gah broă lơh, ală tiah đah 2 lơgar; sơlơ tơnguh lơh broă bal ngan ngồn tàm ală gah broă, gàr sùm bơta bơtàu tơnguh niam bơnĕ tàm lơh broă bal lơh sa- kă bro; sồr Lo pơn jat tai lơh gơlik bơta ƀuơn rề ơnàng blơi ală bơta phan bơh suơn sre Việt Nam dê, sơlơ bơcri priă tàm lơgar Việt Nam mờ ală rơndap broă lơh dờng, geh pơn rơ ai bơta chài bơtàu tơnguh Lo dê.

Tàm Bắc Kinh, lơgar Lo, Củ tịc lơgar ồng Võ Văn Thưởng kung neh wă rò Củ tịc Ngân hàng Bơcri priă phan bơna bơ̆t bơtàu câu Á (AIIB) ồng Kim Lập Quần. Tàm dơ̆ wă rò, Củ tịc lơgar jờng rơ ngan AIIB neh sùm rề ơnàng lơh broă, lơh geh uă cồng nha kwơmàng mờ ngai sơlơ tơnguh uă gơnoar broă bơh dùl ngân hàng bơtàu tơnguh uă lơgar dê, tàm sơm băt tê bal mờ ală mpồl bè WB, ADB...ai priă jền lơh geh jơnau kờñ bơtàu tơnguh phan bơna bơ̆t bơtàu tàm tiah câu Á, ngan là gơ wèt mờ ală lơgar gam bơtàu tơnguh. Tàm tơngai tus, Củ tịc lơgar sồr AIIB pơgồp bal dong kờl ală lơgar tàm mpồl geh jơnau kờñ uă bè priă mờ măy mok; pơn jăt tai dong kờl bơtàu tơnguh phan bơna bơ̆t bơtàu tiah câu Á, tàm hơ̆ ai lài ală broă lơh tơlir, tơnguh uă pràn jak rơcăng lài mờ bơta tam gơl nhơm trồ tiah.