Tàm dơ̆ tìp, bàr Kwang đơng lam bồ tơlik nùs nhơm chờ hờp bè ală cồng nha kwơ màng tàm broă lơh broă bal đah bàr lơgar dê tàm tơngai do bè geh sùm broă tàm pơgơl mpồl kwang bàng kấp dờng mờ ală kấp lòt còp bal mờ gơ̆p, lơh pràn ală gah broă lơh broă bal lơh sa – kă bro, sền gàr dà lơgar – bơta lơngăp lơngai, khoa họk-kông nghệ, bơto-bơsram, năng lượng, tìp bal làng bol.

Củ tịc lơgar ồng Võ Văn Thưởng đơs niam mờ ưn ngài Kwang atbồ lơgar Nga ồng Putin, ală anih lơh broă gơnoar atbồ, ală tiah tàm lơgar Nga neh dong kờl lơh rùp kah kơlôi Củ tịc Hồ Chí Minh tàm ƀòn dờng Saint Petersburg. Củ tịc lơgar kơ̆p kờñ lơgar Nga pơn jăt tai ai priă bơsram cau bơsram dờng lơgar Việt Nam in tus bơsram tàm lơgar Nga kung bè sơlơ tơnguh tai broă tìp bal bơta niam chài, tìp bal làng bol. Kwang atbồ lơgar Nga ồng Vladimir Putin đơs nền lơgar Việt Nam là dùl tàm ală lơgar tam klăc bal, lơh broă bal kwơ màng ngan bơh lơgar Nga dê tàm tiah câu Á-Thái Ƀìñ Dương, pơn jăt tai ngui ală kơrnoăt, broă lơh broă bal kă bro, bơcri priă bal đah bàr lơgar mờ uă lơgar, tơnguh broă lơh broă bal đah ală ƀộ, gah lơh broă dà lơgar mờ ală càr, ƀòn dờng đah bàr lơgar dê.