Tàm dơ̆ tìp, Củ tịc lơgar ồng Võ Văn Thưởng đơs nền lơgar Việt Nam sùm sền kwơ bơta git gơ̆p đah lơgar Việt Nam mờ lơgar Lào là phan bơna kwơ màng, là bơta git gơ̆p niam bơnĕ, đềt mềr, sàng goh ờ hoan geh ngan tàm bơta git gơ̆p dunia dê. Bàr Kwang đơng lam ring bal pơn jăt tai geh sùm cồng nha ală kơrnoăt tìp bal bơta niam chài, tàp pràn să jan mờ lòt nhơl; lơh jăt niam Rơndăp broă tơnguh uă bơta niam mờ cồng nha lơh broă bal đah lơgar Việt Nam mờ lơgar Lào tàm gah bơto mờ bơsram mờ bơtàu tơnguh cau lơh broă tơngai bơh nam 2021 tus 2030.

Tổng Ƀí thư-Củ tịc lơgar Lào ồng Thongloun Sisoulith pà git lơgar Lào geh sền kwơ ngan bơta git gơ̆p mờ lơgar Việt Nam, sùm lơh ngan nàng bơ̆t bơtàu mờ ai bơta git gơ̆p lơh bơyô bal niam bơnĕ, tam klăc bal mờ lơh broă bal tơl ală bơta đah lơgar Việt Nam mờ lơgar Lào pơn jăt tai bơtàu tơnguh kơl jăp, ngai sơlơ jrô ơnàng; ai tơngŏ geh sùm niam tàm broă pơgồp bal lơh pràn bơta git gơ̆p đah bàr Đảng, bàr Dà lơgar. Kung di tàm dơ̆ do, Củ tịc lơgar ồng Võ Văn Thưởng bal mờ Mpồl kwang bàng Kấp dờng lơgar Việt Nam neh geh dơ̆ tìp kwang bàng, cau lơh broă ală anih ala măt lơgar Việt Nam tàm lơgar Lo.