Mho ngai 20/10, Củ tịc lơgar ồng Võ Văn Thưởng mờ Mpồl kwang bàng kấp dờng lơgar Việt Nam neh rê tus Hà Nội, tơn jơh niam bơnĕ dơ̆ tus bal Cribơyai kwang bàng kấp dờng lơh broă bal dunia “Gùng kềng mờ Gùng” dơ̆ 3 tàm lơgar Lo. Tàm càr lơgar Bắc Kinh, lơgar Lo, tàm broă lơh tus bal Cribơyai kwang bàng kấp dờng “Gùng kềng mờ Gùng”, Củ tịc lơgar ồng Võ Văn Thưởng neh tus bal Dơ̆ sơnđờm mut pơrjum bal mờ bơta tus bal bơh rlau 4 rơbô nă kwang bàng tus bơh rlau 140 lơgar mờ 30 mpồl dunia mờ rlau 20 nă kwang atbồ dà lơgar, cau lam bồ bơh Cíñ phủ neh tus bal Cribơyai do.

Tàm Cribơyai do, Củ tịc lơgar ồng Võ Văn Thưởng neh đơs jơnau đơs nền lơgar  Việt Nam dê sùm kờñ ală jơnau bơceh lơh geh kwơ ai ring lơngai, lơh broă bal bơtàu tơnguh tàm tiah do mờ tàm dunia; tàm hơ̆, geh jơnau bơceh lơh Gùng kềng mờ Gùng bơh lơgar Lo dê sơnđờm mut lơh. Di dơ̆ tus bal Cribơyai, Củ tịc lơgar neh geh uă dơ̆ tìp mat; tìp mat uă kwang đơng lam bồ dà lơgar, kwang atbồ mpồl ală lơgar, ală mpồl dunia, cribơyai ală broă lơh tơnguh uă geh cồng nha lơh broă bal đah 2 gah. Dơ̆ lòt còp neh geh cồng nha niam bơnĕ ngan, tơngŏ jơnau hơ pơr gon pràn kơl dang bơh lơgar Việt Nam dê gơwèt mờ broă lơh uă lơgar dê, sơlơ tơnguh lơh broă bal mờ lơh bal lơh sa tàm tiah do mờ gùt plai ù.