Dờp jơnau jà bơh Tổng Ƀí thư Ƀan cấp hàñ Đảng Kộng sản lơgar Lo, Củ tịc lơgar Lo ồng Tập Cận Bình dê, drim ngai 17/10, Củ tịc lơgar ồng Võ Văn Thưởng lam bồ Mpồl kwang bàng kâp dờng lơgar Việt Nam lòt gùng tus Bắc Kinh, tus bal Cribơyai kwang bàng kâp dờng lơh broă bal dunia “Gùng kềng mờ gùng” dơ̆ 3 bơh ngai 17 tus ngai 20/10.Do là dơ̆ lòt lơh broă sơn rờp bơh Củ tịc lơgar ồng Võ Văn Thưởng dê tus lơgar Lo kờp bơh tơnơ̆ tŭ Việt Nam bơyai lơh geh cồng nha pơrjum dờng Đảng dơ̆ XIII mờ Lo bơyai lơh geh cồng nha Pơrjum dờng Đảng dơ̆ XX. Nam 2023 kung là nam tơngkah kir sơnrai 15 nam bơta git gơp lơh broă bal kuơmàng tơl làm đah Việt Nam mờ Lo mờ tơngkah 10 nam crơng gơs mờ lam lơh Jơnau bơceh lơh Gùng kềng mờ gùng. Dơ̆ lòt lơh broă do bơh Củ tịc lơgar ồng Võ Văn Thưởng dê geh kuơ dờng màng ngan, ai tơnggŏ bơta ki ngàm uă ngan, bơta gròi sền khà dùl bơh Đảng, dà lơgar he dê tàm broă bơtàu tơnguh bơta git gơp mờ lơgar Lo.